Shillong, Naiwieng 20
Ka Mylliem SC ka la pynliem da 2-0 kol ïa ka Nongrah SC na ka bynta ban ïoh jingjop ha ka lympung ïalehkai 1st Division Football League 2024 ba la pynïaid da ka Shillong Sports Association ha ka Sngi Ba-ar.
Kane ka nam jop ka la wan urlong lyngba ki kol u Shembha Langbnang bad u Closing Lynshing na ka bynta ban pynlong ïa katei ka kynhun ban ïoh lai point.
Haba phai sha kane ka jingïakhun, baroh ar kynhun ki la pyrshang ban ïakhun tyngeh naduh kaba sdang. Ka Mylliem ka la ïoh ban pynkhih jar nyngkong eh lyngba u Shembha ha ka minit kaba 12. Kane ka kynhun ka la thep biang ha ka kylla miet lyngba u Closing ha ka minit kaba 75. Haduh kaba kut jong ka jingïalehkai ka Nongrah kam shym la lah ban pynphai bad ka la mad ïa ka jingshah rem.
Haba phai sha kawei pat ka jingïakhun kaba ar hapdeng ka Lawsohtun SC bad ka Mawtawar SC ki la ïasam mar shi point hadien ba ki la ïakhaid mar 2-2 kol.
Ha kane ka jingïalehkai ka Mawtawar ka la ïoh pynkhih jar nyngkong eh lyngba u Emer Nongrut ha ka minit kaba nyngkong, hynrei ka Lawsohtun ka la lah ban pynphai kylla lyngba u Rishanskhem Nongkynrih (15).
Hadien katto-katne ba la bteng ïa ka jingïakhun jong ka kylla miet, ka Lawsohtun ka la thep biang sa shi kol lyngba u Kitboklang Pale (52), hynrei shwa ban wai ka Mawtawar ka la pynphai kylla lyngba u Wallam Dkhar (82) na ka bynta ban ïakhaid mar ar kol.
