Kyiv, Naiwieng:
Katkum ki khubor, la ong ba ki shipai ïada ri jong ka Ukraine, ki la leit hiar thma ha ka sien nyngkong eh sha khappud ka Russia da kaba pyndonkam ia ki ‘namding ATACMS jong ka US hadien ba ka sorkar jong u Biden ka la ai jingbit ia ka Ukraine ba kan pyndonkam ia kitei ki ‘namding ba khlaiñ bor jong ka shwa ba ka samoi treikam jong u Biden kan kut noh syndon ban aiti noh ha u Donald Trump uba la shah jied kum u President bathymmai jong ka US.
Katei ka sienjam, ka la jia ha ka sngi ba ka jingleit hiar thma jong ka Russia sha Ukraine ka la don 1,000 sngi bad ka Ukraine ka la leit hiar thma ia ka Russia ruh tang hadien ba ka sorkar jong u President ka US- u Joe Biden, ka la ai jingbit ia ka Ukraine ba kan pyndonkam tang khyndiat ia kitei ki tiar thma ba kan ioh ban siat sha ki jaka jong ka Russia kiba ka Ukraine ka sngew donkam ban siat. Katkum ki khubor jong ki lad pathai khubor jong ka Ukraine, katei ka jinghiar thma ka dei kaba la thmu ïa kawei ka jaka treikam jong ki shipai jong ka Russia kaba don hajan ka nongbah Karachev ha ka thaiñ Bryansk, kaba don kumba 130 Kilometre na khappud jong ka Ukraine.
La iathuh ba katei ka jinghiar thma, ka long ha ka miet jong ka 19tarik u Naiwieng, ha kaba ka Ukraine ka la ther ia kitei ki ‘namding sha ka 67th Arsenal jong ka jaka pynher ‘namding ba shyrkhei jong ka Russia.
U General Staff jong ka Ukraine ruh u la pynthikna ïa ka jingshah thombor ha kawei ka jaka ba don hajan Karachev hynrei um shym la kren eiei satia ïa ki namding aiu ba la pyndonkam da kaba ong ba ki jingtip ki long kiba rieh.Haduh mynta, ka Ukraine, ka dang pyndonkam da ki drone ba la shna hi, ban hiar thma shapoh jong ka Russia, hynrei ka jingpyndonkam ia ki tiar ialeh jong ka US, kan long kaba kham pynjot.
Ka Russia, ha ka Sngi Balang, ka la pynthikna ba ka Ukraine, ka la pyndonkam ïa ki namding ATACMS, kiba la ai da ka US sha ka Ukraine bad kiba ka US ka dang shu ai jingbit shen ia ka Ukraine ba kan pyndonkam ia kitei ki ‘namding hashwa ba ka samoi treikam jong u Biden kan kut noh syndon.
U Lavrov, u la kyntu ruh ïa ki Ri Sepngi, ba kin pule ïa ka hukum, kaba la soi da u President Russia, U Vladimir Putin, ha ka Sngi Ba-ar, kaba pynhiar ïa ka jingthew, lano ka Moscow, kan lah ban pyndonkam ïa ki tiar nuclear.
