Jowai, Naiwieng 20
Ka Mukhla Raij bad Nangbah Mulang ki la ïakhaid katba ka Shangpung Lumiawmushai ka la khur jingjop ha ka Super Division Football Tournament-U Kiang Nangbah Memorial Trophy ba la pynïaid da ka West Jaintia District Sports Association (WJDSA) ha madan Kiang Nangbah Stadium, Jowai ha ka Sngi Balang.
Ha ba phai sha ka jingïalehkai hapdeng ka Mukhla Raij bad Nangbah Mulang ka jingïalehkai ka la kut da ka jingïasam poin. Ka Nangbah Mulang tang ha ka minit ka ba 2 ka la ïoh ban pynkhih jar lyngba u Precious Tang katba ka Mukhla Raij ka la pynïakhaid ïa ka jingïalehkai ha ka minit ka ba 80 lyngba ka kol ba la thep da u Deni Suna.
Ha ka jingïalehkai ka ba bud, ka Lumiawmuchai ka la pynliem ïa ka Sailung Ialong da 2-1 kol. Ka Sailung Ialong ka la ïoh ban pynkhih jar nyngkong ha ka minit ka ba 6 lyngba u Budhokmiki Rymbai katba ka Lumiawmushai ka la lah ban pyntam da ar kol lyngba u Salanbhami Suchiang ha ka minit 13 & 66.
Mynta ka Sngi Palei ka jingïalehkai kan long hapdeng ka Ladthadlaboh bad Demthring ha ka por 11.00 baje mynstep ka Wahiajer bad 7 Wasa ha ka por 2.00 baje nohphai sngi.
