New Delhi, Naiwieng:
Ki sienjam ba heh jong ki jingthmu ka India ha ka kam semiconductor ki paw lyngba ka jingtei ia ka karkhana semiconductor ha Morigaon jong ka jylla Assam, kaba ïalam lynti da ka Tata Semiconductor Assembly and Test Pvt Ltd (TSAT). Kane ka projek ka ban long kawei na ki jaka ba kongsan jong ka ri ban pynmih ia kine ki mar, ka ïahap bad ka jing-thmu ba kham heh jong ka ri ban tei ïa ki kam semiconductor khnang ban ïoh ban pyndap ïa ki jingdonkam ba kongsan hapoh ka ri baroh kawei. Bad kumta la khmih lytni ba da ka jingbei tyngka kaba T. 27,000 klur, kane ka jaka ha Morigaon kan pynmih haduh kumba 48 million tylli ki semiconductor chip ha ka shi sngi da kaba pyndonkam ïa ki bor bad jingstad jong kane ka juk ba mynta kum ka ‘flip chip’ bad ‘Integrated System in Package’ (ISIP). Kane ka jaka treikam ka dei kaba la saiñdur ban pynbiang ïa ki kam kiba kongsan kum ïa ki kali, kali elektrik (electric vehicles), ki laiñ ïakren phone (telecommunications) bad ki mar elektrik ba kongsan ba ki briew ki ju pyndonkam bha bad ïa kane la thmu ban pynurlong noh baroh kumno-kumno hapoh jong u snem 2025.
Kane ka jaka treikam ha Morigaon kam dei tang ka kam jong ka jingkiew ka teknoloji hynrei ka wanrah ruh ki jingmyntoi ïa ka imlang- sahlang bad ka ïarap ruh ban kyntiew ïa ka ïoh- ka kot da kaba pynmih ruh haduh kumba 15,000 tylli ki kam ha kane ka jaka trei bad 11,000-13000 hajar tylli ki kam kiba ïadei bad ka, ka ban don ka bynta kaba heh ha ka jingkiew ka ïoh ka kot ha Assam bad ki jaka ba marjan. Kum ka jaka kaba khlaiñ ha ka jingpynmih mar, ka jingpynmih mar man ka sngi na kane ka jaka treikam kan pynbiang mar na ka bynta ki ïew hapoh bad shabar ka ri bad kyntiew ia ka India kum ka bor ha ka kam pynbiang semiconductor ha ka pyrthei.
Namar la antad ba kane ka kam semiconductor jong ka India ka long kumba $38 billion ha u 2023 bad katkum ka jingbuh jingkheiñ antad la ong ba kane ka kam kan ïarap ban kyntiew shaduh ka $109 billion tang hapoh jong u snem 2030. Ban kyrshan ïa kane ka jingkiew bad pynduna ïa ka jingshaniah ha ka jingshalan nabar ri, ka Sorkar India ka la wanrah da kine ki sienjam ban kyntiew ïa ka jingpynmih semiconductor hapoh ka ri. Ka India Semiconductor Mission (ISM) ka thmu ban tei ïa ka jinglong jingman ka ban kyntiew ïa ka India kum ka nongïalam ha ka jingsaindur bad jingshna ïa ki mar elektrik. Lyngba ka jingïalam jong ki riewshemphang ha ki kam semiconductor na kylleng ka pyrthei, ka ISM ka pynïasoh ïa ki sienjam jong ki tnad sorkar, ki karkhana bad ki jaka pule ban pynthikna ïa ka jingpyndonkam ia ki jingdon jingem bad ka jingkyrshan ha ka rukom kaba seisoh bha.
Namar la ong ba ka prokram Semicon India kaba la sdang ha u snem 2021 kaba la mang ban pynlut haduh T. 76,000 klur bad ka ban kyntiew ïa ka kam semiconductor ha ka ri lyngba ki jingai jingmyntoi bad ki jingiatreilang. Kane ka sienjam ka ai jingkyrshan ïa ki kam bapher- bapher kiba ïadei bad ki laiñ semiconductor bad kane kan ym sahkut ruh tang ha ki jaka shna hynrei ka kyrshan ruh ïa kiwei ki liang kum ka jingpynmih ïa ki sainar display, ki Outsourced Semiconductor Assembly and Testing (OSATs, ki sensor, bad kiwei kiwei ki bynta ba kongsan, kaba wanrah ia ka rukom treikam kaba pura. Hapoh kane ka prokram, la wanrah saw tylli ki skhim kiba long ka Modified Scheme ban sdang ïa ki jaka shna semiconductor ha India, ka Modified Scheme ban shna ïa ki jaka shna Display ha India, ka Modified Scheme ban shna ïa ki Compound Semiconductor/ Silicon Photonic/ Sensors Fab/ Discrete Semiconductors Fab bad Semiconductor ATMP/ OSAT ha India, bad ka Design Linked Incentive (DLI) Scheme.
Ka jaka shna semiconductor ha Morigaon ka long ruh shi bynta ka rynsan kaba kham heh jong ki projek ba ai jingkyrshan da ka Sorkar kaba thmu ban kyntiew ïa ka bor pynmih semiconductor ka India. Ka Kynhun Myntri jong ka Sorkar Pdeng ka la ai jingmynjur ïa ka jingsdang shibun tylli ki jaka shna semiconductor ha kylleng ka ri ba kynthup ïa ki jaka bathymmai da ka Tata Electronics ha Dholera, Gujarat, bad CG Power ha Sanand, Gujarat. Shuh shuh, la ai jingmynjur ïa ka, KaynesSemicon Pvt Ltd ba kan sdang ïa ka jaka treikam ha Sanand. Kane ka jingpyniar ka pyni ïa ka jingkut jingmut ka India ban pynduna ïa ka jingshaniah ha ka jing shalan ia ka semiconductor na shabar ri bad pynkhlaiñ ïa ka bynta jong ka ri ha ka jingpynbiang semiconductor na ka bynta ka pyrthei.
Ka Sorkar ka la peit bniah ruh ïa ka jingpynthymmai ïa ka rukom treikam ha ka Semi-Conductor Laboratory ha Mohali bad ka rukom pyntreikam ïa ka skhim ‘Scheme for Promotion of Manufacturing of Electronic Components and Semiconductors’ (SPECS) bad ka ‘Production Linked Incentive’ (PLI) Scheme na ka bynta ki mar elektrik. Kine ki sienjam ki pynthikna ïa ka jingkyrshan ïa baroh ki bynta jong ka kam pynmih semiconductor kaba kynthup ïa ka jingsaiñdur ïa ki chip, ka jingshna, testing bad jingpyndait.
Namarkata, la ong ba ka jingwanrah ïa katei ka jaka pynmih semiconductor ha ka nongbah Morigaon jong ka jylla Assam, ka long ka sienjam kaba khraw tam ban pyn-urlong ïa ki jingthmu jong ka ri India ban kyntiew ïa ki kam semiconductor. Kane ka projek, ha ryngkat kiwei kiwei ki projek ba la ai jingmynjur hapoh ka Semicon India Program, ka pynkhlaiñ ïa ka nong-rim teknoloji jong ka India bad ka pyn urlong ïa ka jingthmu jong ka India ban kyntiew ïa ïoh- ka kot bad ban lah ban pynïoh ne pyndap ïa baroh ki jingdonkam jong ka ri. Katba ka jingdawa ïa ki semiconductor ka kiew ha kylleng ka pyrthei, ki jingdon jingem jong ka India kiba ïadei bad ki semiconductor kan wanrah ïa ka jingsaindur thymmai, kan plie ki lad ïoh kam bad pynskhem ia ka kyrdan jong ka India kum ka ri kaba don ka bynta kaba heh ha ka ïoh ka kot digital jong ka pyrthei.
