Shillong, Naiwieng 21
Ka Hynñiewtrep Youths’ Council (HYC) Sengkmie ka la pynpaw ïa ka jingsngew pyrshah jur halor ka bai bording ba thymmai jong ka Meghalaya State Electricity Regulatory Commission (MSERC) bad ong ba imat don eiei sha lyndet ba ka MSERC ka kjit na ki paidbah ban bsa pat ïa ki karkhana.
Ka HYC ha ka 21 tarik u Naiwieng 2024, ka la leit ban ïakynduh ïa u Chairman ka Commission, u Chanda Kumar Mondal ban pan jingpynshai halor ka hukum kaba la pynmih da ka Meghalaya State Electricity Regulatory Commission (MSERC) ha ka 24 tarik u Risaw 2024 ha kaba ïadei bad ka jingpynkiew ïa ka bai bording ilektrik kaba la ktah shikat dei eh ïa ki nongshong-shnong ka Jylla.
Haba kren sha ki lad pathai khubor, u President Bah Roy Kupar Synrem u la ong ba hadien ka jingpeit bniah ïa katei ka hukum ba la pynmih da ka MSERC ha ka 24 tarik u bnai Risaw 2024 bad kumjuh ïa ka hukum ba la pynmih hi da ka MSERC na ka bynta u snem 2024-25, hynrei kaei kaba lyngngoh ka long ba ka MSERC ka la pynmih ïa kane ka hukum hapdeng jong u snem da kaba pynpaw ba ka jingleh jong ka Commission ban pynkiew ïa ka dor jong ki ‘Domestic Consumer’ kynsan-kynsan na ka T.80 sha ka T.90 bad ïa ka ‘Energy Charges’ jong ka 100 unit kaba nyngkong ha kaba ïa ka dor la buh thik T.4 hynrei mynta ki la pynkiew kynsan sha ka T.5.5.
“Katkum ka jingsngewthuh jong ngi, ka Commission kam ju lah ban pynkylla ïa ka tariff ne ka dor hapdeng jong u snem hynrei kaba lyngngoh ka long ba kane ka Commission kaba don mynta, ka la wanrah kynsan ïa ka jingpynkylla ha u bnai Risaw jong mynta u snem ha kaba ïa ka dor ne tariff jong ki ‘Domestic Consumer’ ne ki riew paidbah jong ka Jylla kiba don kumba 7 lak tam ha kaba ïa ka dor jong ki, la shu pynkiew kynsan-kynsan”, u la ong.
U la ong ba haba phai pat sha ka dor bai bording ilektrik jong ki karkhana baheh-baheh, la ïohi ba ka don ka jingailad lane ka jingpynjem ïa ka dor ha kaba ha ka dor ba la buh mynshwa na ka bynta u snem 2024-25, ka dor jong ki ka dei T.7.80 per unit hynrei ha ka Commission kaba mynta pat, ki la pynhiar kynsan sha ka T.6.41 bad ong ba kane ka pyni shai kdar ïa ka jingdon ka jingleh shiliang ha ka rukom buh ïa ka dor.
“Ka jingwan ïakynduh jong ngi mynta ka sngi ïa u Chairman bad ïa ki ophisar jong ka MSERC ban pynpaw ba kum ka seng, ngi pyrshah jur ïa kane ka jingpynkiew dor ïa ka tariff hapdeng jong u snem bad khamtam eh ban pynkiew dor ïa ka tariff jong ki ‘Domestic Consumer’ ne ki ‘riew paidbah bad ban ailad pat ïa ki karkhana ba kin ïoh ïa kata ka tariff kaba duna dor”, bynrap u Bah Synrem.
U la ong ruh ba ha ki por kiba la dep, ki Chairman ka Commission ki dei kiba na ka Jylla hynrei mynta pat la wanrah da u briew u bym dei satia na kane ka Jylla.
