Jowai, Naiwieng 21
Ka Demthring bad ka Wahïajer ki la ïoh jingjop ha ka Super Division Football Tournament na ka bynta U Kiang Nangbah Memorial Trophy ba la pynïaid da ka West Jaiñtia District Sports Association (WJDSA) ha madan Kiang Nangbah Stadium, Jowai ha ka Sngi Palei.
Ha ka jingïakhun kaba nyngkong, ka Demthring ka la pynliem noh ïa ka Ladthadlaboh da 1-0 kol bad ïa kane la thep da u Francis Mukhim ha ka minit kaba 78.
Ha kawei pat ka jingïalehkai kaba bud, ka Wahïajer ka la pynliem ïa ka 7 Wasa da 1-0 kol bad ïa kane la thep da u Budda Rani ha ka minit kaba 86.
Haba phai sha ka miej kheiñ poiñ ha kane ka lympung ïalehkai kaba mar san sien, ka Nangbah Mulang ka dang bat ïa ka kyrdan kaba ha khlieh duh da kaba ïoh 13 poiñ, bud ka Demthring bad Wahïajer mar 10 poiñ, 7Wasa (8 poiñ), Ladthadlaboh (7 poiñ), Mukhla Raij (5 poiñ), Shangpung Lumiawmushai (3 poiñ), katba ka Sailung Ïalong kam shym la lah ban thaw pyrthei bad ka la shah rem ha baroh ki jingïakhun.
Ka jingïalehkai ha ka Sngi Saitjaiñ (23 tarik) kan long hapdeng ka Demthring SC pyrshah ïa ka Mukhla Raij ha ka por 11 baje mynstep, katba ka Wahïajer ïa ka Sailung Ïalong ha ka por 2 baje nohphai sngi.
