Shillong, Naiwieng 21
U nongmareh marathon barim ka Jylla, Bah Binningstar Lyngkhoi u la kyntu ïa ki samla jong ka ri India ban ïashim bynta shitrhem ha ka jingïakop Viksit Bharat na ka bynta ka National Youth Festi-val 2025.
Da ka khubor ai mynsiem, u Bah Lyngkhoi u la pynshlur ïa ki samla jong ka ri ban shim ïa kane ka jingïakop kum ka kabu ban kyntiew, ban ïoh jinghikai, bad ban saiñdur ïa ka lawei jong ka ri.
Mynshem taïew u Myntri ka tnad ïalehkai jong ka Sorkar Pdeng, u Dr. Mansukh Mandaviya u la pynbna ban pynlong ïa ka ‘Viksit Bharat Young Leaders Dialogue’ ha ka National Youth Festival ha ka 11 bad 12 tarik Kyllalyngkot jong u snem ban wan. Ha kane ka prokram kaba ar sngi, u Myntri Rangbah duh jong ka ri, u Narendra Modi un ïakren bad 3000 ngut ki samla ha Bharat Mandapam ha ka nongbah Delhi.
“Kum u nongïalehkai, nga la shem ba man ka jingïakhun ka dei ka kabu ban kiew shaphrang. Ka Viksit Bharat Young Leaders Dialogue ka ai ka rynsan ïa phi ban pyni ïa ki sap jong phi, ka pynproh ïa ka bor pyrkhat, bad pynïasoh bad ki briew kiba stad na kylleng jong ka ri. Ïashim bynta ha ka jingïakop Viksit Bharat – ka dei ka kabu ïa phi ban tyngshaiñ bad ai mynsiem ïa ki pateng ban wan. Ngeit halade ban leh bha!” la ong u Bah Binning.
Ka wat kaba nyngkong jong ka Viksit Bharat ka kynthup ka jingïakop jong ka ‘all-India digital quiz’, ban long hapdeng ka 25 tarik mynta u bnai bad 5 tarik u Nohprah 2024. Ki samla hapdeng ka rta 15 bad 19 ki lah ban ïashim bynta ha ka jingkyntip (quiz) ban pynlong ha ka rynsan Mera Yuva Bharat (MY Bharat). Kane kan peit ïa ka jingnang jingstad jong ki samla bad ka jingsngewthuh jong ki ïa ki jingjop ba kyrpang jong ka India.
Ki nongjop ha kane ka jingïakop kyntip kin hap pyndep sa ka wad kaba lai ha ka dur jong ka jingïakop thoh essay/blog, ka jingpyni ïa ka ‘Viskit Bharat Vision’ ha ka Jylla bad ka jingïakhun ha ka ri ha kaba yn ïashim bynta da ki nongjop na ki jylla bapher bapher ha ka Bharat Mandapam.
Ha shuwa kane, u Dr. Mansukh Mandaviya u la kren shaphang ki jingthmu jong ka ‘Viksit Bharat Young Leaders Dialogue’, bad u la ong, “Ka tamasa ka thmu ban ithuh bad kyntiew ïa ki sap jong ki samla, da kaba pynbiang ka rynsan ïa ki ban ïasam ïa ki jingthmu jong ki na ka bynta ka Viksit Bharat. Ka bynta ba kongsan na ka bynta ki samla kan long ka kabu ban ïakren markhmat bad u Myntri Rangbahduh bad ai ïa ki jingthmu jong ki na ka bynta ka lawei jong ka India, bad ban kyntiew ïa ka jingdon bynta ki samla ha ki kam saiñ pyrthei bad imlang-sahlang.”
U Dr. Mandaviya u la buh thong ban khring kumba 1 klur ngut ki samla (hapdeng ka rta 15-29 snem) na kylleng ka ri ban ïashim bynta ha ka jingïakop Viksit Bharat, ka ban long kum ka wat ba nyngkong sha ka prokram ba kongsan ha Bharat Mandapam.
Ka Viksit Bharat Young Leaders Dialogue – National Youth Festival 2025 kan wanrah lang ïa ki samla ba shah jied ha ki lai tylli ki bynta. Ka kynhun kaba nyngkong ka kynthup ïa ki nongïashim bynta na ka Viksit Bharat Challenge ba dang shu pynbna. Ka kynhun ba ar ka kynthup ïa ki samla ba don sap kiba wan na ki district bad state-level youth festival ki ban ïakhun ha ki bynta bapher bapher kum ka jingïakop dro, ki jingpyninam saïan, ki jingpyni ïa ka deiriti, ki jingïakop ha ka liang kren ne poitri (declamation) bad kiwei kiwei. Ka kynhun ba lai kan kynthup ïa ki nongprat lynti bad ki samla ba pawnam ha ki kam bapher bapher ba kynthup ïa ka jingseng kam lajong, ki kam ïalehkai, ka rep ka riang, ka teknoloji bad kiwei kiwei. Baroh ki jingtip ba ïadei bad ka Viksit Bharat Young Leaders Dialogue – National Youth Festival 2025 kin don ha ka rynsan MY Bhart (https://mybharat.gov.in/).
