Shillong, Naiwieng 21
Ka Malki SC ka dang ïai bteng ban bat ïa ka kyrdan ba ha khlieh jong ka SSA First Division Football League, hadien ba ka lah ban pynjem khnap ïa ka kynhun kaba don shatrai, ka Umphyrnai haduh 7-1 kol ha ka Sngi Palei ha SSA Stadium, Polo.
Ha kane ka jingïakhun u Elisha Ryntathiang, Fashioning Syngkli bad u Damut Wahlang ki la thep mar ar kol, katba ïa ka shi kol la thep da u Niklestone Ryntathiang.
Wat la ka Umphyrnai ka la ïoh ban pynkhih jar nyngkong eh ha ka minit kaba 12 lyngba u Isharwell Mukhim, pynban ka Malki ka la lah ban pynphai kylla haduh ar kol ha ka kylla step lyngba u Elisha (22) bad u Niklestone Ryntathiang (27).
Ha ka kylla miet ka Malki la la thep sa san kol lyngba u Elisha (69), Fashioning Syngkli (62 & 65) bad u Damut (63 & 81) na ka bynta ban ïoh jingjop syndon.
Kumba ka long mynta ka Malki ka la ïoh 18 point bad ban tam da 3 point ïa ka Mawtawar kaba don ha ka kyrdan ba-ar, katba ka Umphyrnai ka dang ïai sah 4 point na ki phra sien ïakhun.
Ka jingïalehkai ha ka Sngi Thohdieng kan long hapdeng ka Mawkhar SC pyrshah ïa ka Sohryngkham SC ha ka por 11 baje mynstep, katba ka Lawsohtun SC ïa ka Pohkseh SC ha ka por 2 baje nohphai sngi bad ka Mawtawar SC ïa ka Mylliem SC ha ka por 5 baje janmiet.
