Nongpoh, Naiwieng 21
Ki Nongïalam bathymmai jong ka Nongpoh Region Auto Owners & Driver Association (NRAODA) da ka jingbitar halor ka jingleh donbor bad pyndonkam bakla jong u Bah Marcus Marten, President bad W Makri, Secretary barim jong ka NRAODA ïa ka kyrteng jong ka seng ki nongñiah kali kamai Autorickshaw, ha ka Sngi Palei ki la leit ban ujor sha u Deputy Commissioner bad Superintendent of Police ka Ri Bhoi District ban dawa ba ki dei ban shimkhia bad leh eiei halor kane ka bynta.
Haba kren sha ki lad pathai khubor hadien ka jingïakynduh ïa u SP bad DC ka Ri Bhoi, u Bah Banasar Lyngdoh Nonglait lem bad u Bah Elinby Tynsong ba dei President bad Education Secretary bathymmai, ki la kynnoh ba kitei ar ngut ki nongïalam barim jong ka NROADA wat hadien ba la dep ban pynthymmai ïa ki nongïalam jong ka seng kiba la ïoh ruh ka jingithuh na ka ophis treikam jong u Deputy Commissioner ka Ri Bhoi District, hynrei ki dang ïai kam sah kum ki nongïalam ka NRAODA da kaba ïai bteng ban khrong pisa bad sam ruh ïa ka shithi ban pynlong ïa ka jingjied ïa ki nongkitkam ba thymmai kaba la thmu ban pynlong ha ka 23 tarik mynta u bnai Naiwieng, 2024.
Kine ki nongïalam bathymmai ka NROADA ki la maham jur ruh ïa u Bah Marcus Marten lem bad ïa u Bah W Makri ba kane ka dei jingmaham khatduh (last warning) bad kim dei shuh ban pyndonkam ïa ka kyrteng ka NRAODA nangne shakhmat, namar ba ki don ïa ki kot ki sla kiba biang ban pynshisha ba ki dei ki nongïalam ba pura jong kane ka seng ki nongñiah kali kamai Autorickshaw, da kaba kynnoh ruh ba utei u Bah Marcus Marten u leh kumba tip aiñ eh, hynrei um tip eiei bad dang ïai leh kum u ‘riewkhlaw.
Halor ka jingkam jong u Bah Marcus Marten ba um ithuh satia ïa kita ki nongpynskhem bad ki nongïalam bathymmai kiba la shah pynskhem, ki la ong kane ka mut ba ka ophis jong u DC Ri Bhoi ka la bakla bad kumta kim banse ba ki hap ban ujor sha u DC bad SP khnang ba kin shimkhia halor kane ka kam ban ïa shai paidbah khnang ba kum kine ki briew kiba nang tang ban pynthohbria bad pynkulmar jingmut ïa ki nongñiah kali kamai Autorickshaw kin ym ïoh lad shuh nangne shakhmat.
Kitei ki nongïalam bathymmai ka NRAODA ki la kyntu ruh ïa ki para nongñiah kali kamai Autorickshaw ba kin ym dei satia ban leit sha katei ka jingïalang jied nongkitkam thymmai kaba la khot da u Bah Marcus Marten bad u Bah W Makri ha kine ki khyndiat sngi ban wan naba kim dei shuh ki nongïalam jong ka seng.
