Shillong, Naiwieng 22
Hadien ka jingïohpdiang ïa ki jingujor ba ka la don ka jingthmu ban beh kam ïa ki briew kiba trei ha Secretariat, na ka liang u nongwad jingtip pawkhmat ka Jylla lyngba ka Right To Information (RTI), Bah Disparsing Rani, u la wad da ka RTI halor kane. Katkum ka jingïoh pdiang jong u ïa ka jubab halor kane ka bynta, kane ka jingshah pynsangeh trei jong kitei ki briew kiba la trei kum ki ‘Daily Wages’ kam dei satia ka jingshah beh kam hynrei kumba ka long ha Secretariat, baroh ki ‘Daily Wages’ ki don ïa kata ka ‘Periodic Break’ ne ka jingshah pynsangeh kam kaba tang shipor ha kaba ki lah ban leit trei biang pat ïa ka kam kham hadien. Haba kren sha ki lad pathai khubor ha Shillong Press Club ha ka 22 tarik u Naiwieng 2024, u Bah Disparsing u la ong ba lada ka don kano-kano ka jingbeh kam, kam dei ban long tang ïa ki 1-2 ngut ki briew hynrei ka dei ban long lang kumjuh ïa baroh.
Haba kylli haduh katno bnai kitei ki nongtrei kin shah pynsangeh kam shipor, na ka liang u Bah Disparsing u la ong ba ha katei ka jubab ba u la ïohpdiang ka khlem don satia ka jingpynshai halor kane ka bynta hynrei na ka liang jong u, un sa hap ban ujor noh da kawei ka RTI ban tip haduh katno bnai ki la shah pynsangeh kam.
U la ai jingmut ruh ïa baroh ki nongtrei kontrak ba kin seng ïa la ka jong ka kynhun khnang ba lada ki ïakynduh ïa kino-kino ki jingeh bad haba ki phah shithi sha ka Sorkar, na ka liang ki nongwad RTI ki lah ban ïarap ïa kitei ki nongtrei da kaba pyntyllun ïa ki jingujor jong ki namar ba bunsien ki jingujor ki shu sahkut hajuh hynrei da ka jingdon pat ïa ki kynhun ne ki synjuk, na ka liang ki nongwad RTI ki lah ban kylli halor la katei ka kam ka la ïaid shakhmat ne ka dang sahkut hajuh.
