Shillong, Naiwieng 22
Ka jingjia kaba la jia ha ka miet jong ka 15 tarik u Naiwieng 2024 kaba dei ka sngi sdang jong ka tamasa ‘Cherry Blossom’ ka dei ka jingjia kaba la pynpyrkhat bad pynbitar ïa ki babun balang halor ka jingbymdon mynsiem sngewlem shuh jong ki bor ba halor ha kaba la kynnoh ba kawei kali pulit kaba bud ïa u Myntri ka Sorkar Jylla ka la leit ban tynrah ïa ka thuk-thuk jong u samla Hudderfield Rymbui uba shong lang bad ka paralok katba ki dang thmu ban leit sha ka tamasa ‘Cherry Blossom’ haduh ba utei u samla un da khlad noh na kane ka sla pyrthei.
Kumta, kum ka dak ka jingsngewlem halor kane ka jingjia, ha ka janmiet jong ka 22 tarik u Naiwieng 2024, na ka liang ki bahaïing jong u samla Hudderfield ha ryngkat ki paralok-parajor bad ki longkmie-longkpa kiba don ïa ka jingsngewkhia kaba jur halor ka jingkhlad jong une u samla, ki la pynlong da ka jingthang mombati ïa kaba la pynlong ha Madan Malki. Haba ai jingkren ha katei ka sngi, na ka liang ka Kong Angela Rangad kaba dei ka nongïalam jong ka Thma U Rangli-Juki (TUR), ka la ban jur halor ka bynta mano ba don hok ban pyndonkam ïa ki ‘siren’ namar katkum ka rukom, ki dei tang ki khlieh nongmihkhmat bad ki khlieh nongbishar kiba lah ban pyndonkam bad lada ki dei ki briew jong ka Sorkar Pdeng ki wan sha ka Jylla ruh ki dei ban da pyntip shwa ban ïoh jingbit ban pyndonkam ïa ki ‘siren’ bad ïa ki pulit synran ki ban synran ïa ki.
Ka Kong Angela ka la ther tyngeh ruh ïa ki nongmihkhmat kiba don ha ka bor da kaba ong ba ki longheh-longhaiñ kim bit ban pyndonkam ïa ki pulit synran ne ki ‘siren’ ne wat ki jingpynthaba ba saw haba ki ïaid kum ki paidbah hynrei ki dei ban pyndonkam tang haba dei ka kam. Katba ha ka nongbah Shillong pat wat hapdeng ka jingkhapniah jong ki kali bad wat hapdeng ka jingïakhun ban pynpoi kloi ïa ki khun sha ki skul bad ka jingjam jong ki khynnah na shiliang sha shiliang ka surok ruh, kitei ki kali kiba tah ïit-ïong ha ryngkat ka jingpynher sted bha kim ju map satia ïano-ïano bad kane ka buh jingma shikatdei eh ïa ki paidbah ki sngew bad ong ba ki sngew ba ki lah ban leh katba ki mon.
Ka la ong ruh ba kum ki paidbah kim dei ban pynkiew skong shuh ïa ki Myntri Sorkar ne ban pynsngew ïa kata ka mynsiem kongsan bad kum ki paidbah ki dei ban kynriah tang lada ïohsngew ne ïohi ïa ka kali kit nongpang hynrei ym dei ban kynriah lada ïohi ïa ki kali ‘VIP’ bad ka dei hangta, kan sa wanrah ïa ka jingkylla hapoh ka Jylla.
“Ngim dei ban pynkiew skong shuh-shuh ïa kine hynrei ngi dei ban pynkynriah tang lada ngi ïohi ïa ka kali kit nongpang. Ngim dei ban kynriah lada ngi ïohi ïa kine bad kata kan wanrah ïa ka jingkylla”, ong ka Kong Angela.
Haba ai jingkren ha kane ka sngi, kawei na ki longkmie kaba la sakhi ïa kane ka jingjia ka la ïathuh ba ka jingwan jong ki kali kiba bud ïa uwei na ki Myntri Sorkar Jylla, ka la long beit thik kumba wan ka ‘er-langthari bad la ong ruh ba ka kali jong kane ka longkmie ka la shah tied ha ki pulit kiba synran ïa une u Myntri Sorkar na ka bynta ban pyllait ïa ka lynti ïaid bad mar sien poi hajan ka ophis ICAR, ka la don ka jingjia aksiden ha kaba une u samla bad ka paralok jong u, ki la kyllon ha madan.
Kane ka longkmie ka la ïathuh ruh ba ka jingbun jong ki kali pulit kiba synran ïa ki Myntri Sorkar ka long beit thik kumba ki leit ban ïaleh thma. Na ka liang kane ka longkmie ka la buh jingkylli ruh ïa ki Myntri ka Sorkar da kaba ong ba lada ki longheh- longhaiñ ki sngewthuh ba ki dei ban poi kloi sha ki prokram, ki la dei ban mih kham kloi.
