Kyiv, Naiwieng:
Ka tnat shipai Ukraine ha ka sien ba nyngkong eh ha kane ka por ka la pyndonkam ia u ‘namding ba shyrkhei ba la ioh na ka Britain ban leit thombor ia ki ktem shipai jong ka Russia hadien ba ka thma jong ka Russia bad Ukraine ka la palat 1,000 sngi.
Namar la ong ba ka UK ka la ai bor ia ka Ukraine ba kan pyndonkam ia utei u ‘namding ‘Storm Shadow’ kum shi bynta ban ialeh pyrshah ia ka jingpyndonkam be-aiñ jong ka Russia da ki shipai jong ka North Korea ha ka jingphah leit hiar thma sha Ukraine.
Kane ka jingleh jong ka Ukraine ka long hadien ba u President ka United States- Joe Biden u la ai bor ia ka Ukraine ba kan pyndonkam ia u jait ‘namding ‘ATACMS’ uba khlaiñ bor jong ka US ba ka Ukraine kan ioh ban leit pynjulor ia ki ktem shipai jong ka Russia kiba ka Russia ka la pynieng bad pynkhreh ban phah hiar thma noh da ki shipai jong ka North Korea.
Namar la ong ruh ba u President ka Ukraine, u Volodymyr Zelensky, u la kyrpad jur ia ki ri Sepngi ba kin ai ka jingkyrshan radbah ia ka Ukraine khnang ba kan lah ban ïada ia u pud-u sam na ka kti jingsynshar jong ka Russia.
Kawei na kitei ki jingkyrpad jong ka Ukraine ka long ban ailad ba kan pyndonkam ia kito ki ‘namding kiba khlaiñbor ba kitei ki ri na West ki la dep phah sha ka Ukraine naduh ki por bad ki snem ba la leit.
Kumta, la ong ba ki shipai ka Russia ki la pyni ia ki lyngkhot-lyng-khai kiba la pra na utei u ‘namding ‘Storm Shadow’ uba la pyndonkam da ka Ukraine ha ka thma sha Russia bad kumjuh 2 tylli ki ‘namding kiba la ioh ban tehlakam noh da ka tnat ïada ka Russia ha ka thaiñ Yeysk.
