Shillong, Naiwieng 22
Ka Meghalaya ka la nangjan sha ka wat kaba khatduh ha ka Senior Men’s National Football Champ-ionship na ka bynta ka Santosh Trophy 2024-25, hadien ba ka la pynliem ïa ka Nagaland da 3-0 kol ha ka jingïakhun kaba ar jong ka Group-E kaba la long ha ka Sngi Thohdieng ha Nalbari, Assam.
Ka Meghalaya ka la pynliem ïa ka Arunachal Pradesh ha ka jingïakhun kaba nyngkong ha ka Sngi Balang bad kumta ka dang ïai bteng ban lamkhmat da kaba ïoh 6 poiñ bad mynta ka dang sah sa kawei ka jingïakhun.
Kane ka jingjop mynta ka sngi ka la wan urlong lyngba u Donlad Diengdoh (21) bad kawei na u kapten Fullmoon Mukhim (26) uba la thep lai kol haduh mynta. Ïa ka kol balai bad kaba khatduh la thep da u Fairming Suting (87).
U Coach ka Meghalaya, Bah Hering Shangpliang u la kylliang tang uwei u rangïalehkai ha kane ka thup, da kaba wanrah ïa u Robertson Khongriah ha ka jaka jong u Badondor Marbaniang.
Ka Nagaland kaba la pynliem ïa ka Assam ar sngi mynshwa bad mynta ka sngi ka Assam ka la pynliem ïa ka Arunachal da 4-0 kol. Kane ka mut ba ka Meghalaya kam dei ban kheiñ sting ïa ka Assam ha ka jingïalehkai kaba khatduh jong kane ka group ka ban long ha ka Sngi U Blei. Lada ka Assam kan pynliem ïa ka Meghalaya bad ka Nagaland kan pynliem ïa ka Arunachal, te kin don lai tylli ki kynhun ki ban ïoh mar 6 poiñ. Hynrei ka Meghalaya ka donkam tang ïa ka jingïakhaid pyrshah ïa ka Assam ban pynthikna ba kan ïoh bat ïa ka kyrdan ba nyngkong ha ka Group-E namar dei tang ka kynhun kaba wan ha khlieh duh na kawei-pa-kawei ka group ka ban pynthikna ban ïoh rung sha ka wat kaba khatduh jong kane ka lympung.
