Dainadubi/Dudhnoi, Naiwieng 24
Ki kynthei na baroh ar tylli ki Jylla – Meghalaya bad Assam, kiba la ïakhih mynta la palat 6 bnai na bynta ban pynsangeh ïa ka jingtih shyiap be-aiñ kaba jia hajan khappud Assam – Meghalaya, ha ka Sngi Thohdieng ki la pynlong da ka jingïaid paidbah kaba palat 5 kilometre kum ka jingbteng jong ka jingïakhih jong ki.
Kane ka jingïaid paidbah ka la kynthup ïa kiba bun ki bynta jong ki jaka ba jyllei ka jingtih shyiap be-aiñ, kaba la sdang na madan skul Damra HS haduh Nokmakundi, kaba don hajan khappud ka Meghalaya.
Kane ka sienjam ka la urlong hadien ba ka Assam kam shym la lah ban pynsangeh ïa kaei kaba ki nongshong shnong ki ñiew kum ka jingleh be-aiñ, ha kaba palat 200 tylli ki trok ‘dumper’ ki ïaid man ka sngi wat la jan baroh ki nongshong shnong ki pyrshah ïa kaei kaba jia.
Ki nongshong shnong ka thaiñ Damra ki la bitar lep hadien ba ki jingpyrshah jong ki lyngba ki jingthoh bad ka ktien kim shym la ïoh kano-kano ka jubab na kito kiba don ha ka bor – bad ka jingtih shyiap ‘be-aiñ’ ka ïai bteng wat hapdeng ki jingpyrshah na ki nongshong shnong.
Ïa kane ka jingïaid paidbah la lamkhmat da ka Mothers’ Union (Assam bad Meghalaya), GSU – Assam State Zone, ka ABSU, KMSS ha ryngkat palat 15 tylli ki CSO na Meghalaya.
“Wat hapdeng ki jingpyrshah kiba bun kiba la pynsngew sha u District Commissioner ka Goalpara bad DFO halor ka jingtih shyiap na Wah Dudhnoi, hynrei kine ki kam ki ïai bteng. Ngi kwah ba kane kan sangeh noh – haba baroh ki tip ba ka long be-aiñ hynrei dang shah pat na ki daw kiba ki tip bha ma ki,” ong uwei u nongshong shnong ka Kasumari, u Brayan Marak.
Palat shi hajar ngut ki paidbah ba kynthup ïa ki Garo bad kiwei-kiwei ki jaidbynriew na Kalikapara, Damra, Nokmakundi, Kasumari, Patpara, Tengasot, Bakrapur bad kiwei-kiwei ki shnong na Meghalaya ki la ïashim bynta.
Ka President ka Mothers’ Union, ka Soma Marak ka la ong ba namar ka jingtih shyiap ha Wah Manda (Dudhnoi) ka um ka la nang hiar man ka sngi.
“Wat ha ki por tlang ruh, ngi ïohi ba ka um ka duna bha ban ïa kaba ngi ïohi ha ka wah. Ha kawei ka liang, ki nongkhaïi shyiap be-aiñ kiba pyndonkam da ki ‘motor’ ki khlong shyiap na ka wah bad kumta ka jingtwa khyndew kaba jur ka la sdang ha katei ka thaiñ naduh Dudhnoi haduh katto-katne ki shnong ha Meghalaya,” ka la ong.
Ha kajuh ka por, kumba la pyntip da katto-katne ki dkhot ka CSO haba ki leit sha u DFO – Goalpara, u ophisar ha ka jingshisha u la kam ba donkam ïa ka jingbun paid bad u la kyrpad ïa ki ban pyni kham bun ki briew kiba pyrshah ïa ka jingtih shyiap.
Shuh shuh, ki la ong ba ki don bun tylli ki ophis bad khyrdop kiba dei khmih ïa kum kine ki kam be-aiñ ha shilynter ka lynti sha Guwahati ha kaba la die ïa u shyiap haduh ba lah ban pynsangeh ha kano-kano ka jaka ban peitngor kumjuh ban peitngor ïa ki ‘challan’. Hynrei wat hapdeng ka jinglong be-aiñ jong ki jingtreikam, ym don ba rah kti, da kaba kdew sha katto-katne ha ka Sorkar Assam (kaba mynta) kiba donkti.
Ka President ka MU ka la bynrap ba ki la don ruh ki jingkular na ka Sorkar (kaba mynta) ban pynduna ïa ka jingtwa khyndew ha ki wah.
“U Myntri Khynnah ka Assam, u Piyush Hazarika u la leit jngoh ruh ïa kiba bun ki jaka harud wah ha ka thaiñ Dudhnoi ryngkat u heh ka RHAC, u Tankeswar Rabha bad bthah ïa ka tnad ban trei na bynta ban khang ïa ka jingtwa khyndew. Kaei ka jingmyntoi ban pynlut pisa khlem da donkam ha kine kiei-kiei haba ka jingtih shyiap ka dang bteng ha ka wah miet la bad sngi,” ka la kylli.
U nongai buit ka ABSU, u Dhiraj Hazowary u la bynrap ba ki ‘Sand Mafia’ ki wanrah jingkulmar ïa ka mariang lyngba ka jingtih shyiap bad kim kohnguh ïa ki kyndon ka Sorkar haba ïadei bad ka jingtih shyiap.
“Ki tnad treikam kum ka tnad khlaw, Transport bad pulit kim ïohi ïa ki ‘dumper’ ba kit shyiap palat pud. Wat hadien ba ki kit shyiap khlem ki ‘challan’ ruh, ym don ba khang ïa ki. Ka don shisha kaei-kaei kaba jia bad tad haduh ba kane ka sangeh, ngin bteng ïa ki jingïakhih jong ngi. I kumba baroh ki kham sngewtynnad ïa ki kam pyrshah ïa ki ‘E-Rikshaw’, ‘Scooty’, ki thuk-thuk bad kiwei kiwei,” ong u Hazowary.
