Guwahati, Naiwieng:
U President jong ka seng Congress ha Assam u Bhupen Borah ha kine ki khyndiat sngi ba la leit u la kam ba ka jingtreikam jong ka seng ha ka ilekshon shiteng samoi kaba dang shen ka la nang kiew bha haba ïanujor bad ka jingthep vote ha Lok Sabha ha u snem 2019.
Haba kren sha ki lad pathai khubor, u Borah u la pynpaw ba ki jingai jingmut na ki nongbud bad ki nongkyrshan jong ka seng ki pyni ïa ka jingkiew kaba paw ha ka jingïasam ïa ki vote jong ka Congress ha baroh san tylli ki konstitwensi ha kaba la pynlong ïa ka jingthep vote.
“Ka jingtreikam jong ngi ka la nang kiew bha ha ki ilekshon shiteng samoi. Ki vote ki la kiew da ka jingïapher kaba kham bha haba ïanujor bad ka ilekshon Lok Sabha,” ong u Borah da kaba bynrap ba ka Congress ka la leh bha ha kawei pa kawei na ki san tylli ki konstitwensi.
Ïa kane ka ilekshon shiteng samoi la pynlong ha ki konstitwensi jong ka Dholai, Samaguri, Behali, Bongaigaon, bad Sidli, hadien ka jingjied ïa ki 5 ngut ki MLA kiba mynta sha ka Lok Sabha.
Ka Dholai ka dei kaba la buh kyrpang na ka bynta ki jaitbynriew Scheduled Caste (SC), katba ka Sidli pat ka dei kaba la buh kyrpang na ka bynta ki Scheduled Tribe (ST).
U Borah, u la kyntait na kaba kren eiei halor ka jingkhmih lynti, ba ka Congress kan jop katno tylli ki konstitwensi, hynrei u la pynpaw biang ba katei ka seng, ka la ai ka jingpyrshah kaba tyngeh, ïa ka Bharatiya Janata Party (BJP) kaba synshar.
“Ngi la ai ka jingïakhun kaba eh ïa ka synshar-khadar. Ïa ka jingmih yn sa rai ha ki bynta ba khatduh jong ka jingkheiñ. Ka jinglong jingman ka la kylla haba ïanujor bad ka ilekshon Lok Sabha,” u la bynrap.
Mynta, ka BJP ka bat ïa saw tylli na ki san tylli ki konstitwensi, ha kaba u Rakibul Hussain jong ka Congress u dang bteng ïa ka jaka ba khlaiñ jong u ha Samaguri.
Ka BJP ka la ïakhun ha Dholai, Samaguri, bad Behali ryngkat ki kyrtong u Diplu Ranjan Sarma, u Diganta Ghatowar, bad u Nihar Ranjan Das. Kane ka ilekshon shiteng samoi ka la long kaba donkam hadien ba ki nongïalam ka BJP u Parimal Suklabaidya bad u Ranjit Dutta ki la pynlait ïa ki shuki dorbar jong ki hadien ba ki la shah jied sha ka Lok Sabha.
