Cairo, Naiwieng:
U heh nongialam ba shipor jong ka Hamas, u Khalil al-Hayya haba iakren bad ki lad pathai khubor ha ka nongbah Gaza ha ka Sngi Balang, u la ong ba ka Hamas kam treh ban pdiang ia ka jingtyrwa jong ka Israel ban pyllait briew markylliang lada ka Israel hi kam kular ban sangeh bad pynkut noh ia ka thma ha Gaza.
Kumta, utei u heh nongialam ba shipor jong ka Hamas u la ong ba katba ka Israel kam pat rai ban sangeh thma, ka Hamas kan ym lah da lei-lei ruh ban pyllait ia ki briew jong ka Israel, kam pher wat lada ka Hamas kan hap ban iap bad duh jait ruh hynrei kitei ki briew jong ka Israel ruh kin shah ktah lang na ka jingleh jong ka Israel.
Namar u la ong ba lada ka thma ha Gaza kam lah ban kut, balei ka Hamas kan pyllait ia kitei ki briew jong ka Israel khlem ka jingiasuk.
U Hayya, u long u nongialam uba lam khmat ia ka Hamas kaba leit ban iakren sha Qatari bad Egypt na ka bynta ban iakren iasuk haba iadei bad ka thma jong ka Hamas bad ka Israel. Une u nongialam ka Hamas u la kynnoh ruh ba baroh ki jingsah-teng haba iadei bad ka jingiakren iasuk ban sangeh thma, ki long namar ka jingleh jong u Myntri Rangbahduh ka Israel, u Benjamin Netanyahu.
Haba ai jingkren ha ka jingleit jurip sha Gaza ha ka Sngi Ba-ar, u Netanyahu u la ong ba ka Hamas kan ym ioh shuh ban synshar biang ia ka nongbah Gaza namar ka Israel kan ym ailad shuh ia kane kajuh ba kan wan jia biang ha ki snem ne ki por ban wan.
U Netanyahu u la ong ruh ba ka Israel kan ym sangeh ban bud-dien bad ban ioh pyllait im ia baroh 101 ngut ki nongshah rahbor na Israel kiba long ki briew jong ka Israel bad kiba dang sahkut ha ka kti jong ki lehnoh Hamas haduh mynta. Hynrei ban pynskhem shuh halor kane, u la thong ruh da ka pisa haduh $5 Million na bynta iwei nongshah rahbor lada don kino-kino kiba lah ban pyllait im bad pynpoi iing biang ia kitei kiba shah rahbor.
Kumta, la ong ba ka Hamas naduh ba sdang hi jong ka jingiakren bad ka Qatar kumjuh ka Egypt, ka la pynpaw ba ka kwah ban pynkut noh ia ka thma ha nongbah Gaza hynrei dei ka Israel ka bym mynjur ia kane. Na ka liang u Myntri Rangbah Israel u kular tang ban ia pyllait markylliang ia ki briew (Israel bad Palestine) hynrei um shym kular pat ban sangeh noh syndon ia ka thma.
