Khliehriat, Naiwieng 24
Ka Diengshynrum ka la rah ïa ka nam lahduh jong ka lympung ïalehkai 1st Division Football Tournament ba la pynïaid da ka East Jaiñtia Hills District Football Associa-tion (EJHDFA).
Kane ka la hadien ba ka la lah ban pynliem noh ïa ka Shilliang Umshong da 1-0 kol ha ka jingïalehkai final kaba la long ha ka Sngi Saitjaiñ ha madan EJDSA Artificial Deinshynrum.
Ïa kane ka shi kol la thep da u Diamond Sympli ha ka minit 90+2 kaba la biang pura ïa ka Diengshynrum ban rah ïa ka nam jop ha kane ka aïom.
Kumba ka paw na kane ka jingïakhun ka la long kaba itynnad bad kaba ïakhaid bha ha kaba baroh ar liang mamla ki la long biang ïabiang bor bha ha kaba ym shym la don ba lah ban pynkhih jar naduh kaba nyngkong bad dei tang ha shwa ban wai ba ka Diengshynrum ka la lah ban pynurlong ïa ka jingjop.
U kongsan ha katei ka sngi u long u Bah Tiufill Shadap ha ka jingdonlang u symbud kongsan u Bah Delmi Shylla, Bah Fine-lyness Bareh, EM ka JHADC, Bah Kor Sympli, Bah Kerlang Ksoo (Advo-cate) ryngkat ki Waheh Shnong bad ki riew pawkhmat napoh District East Jaiñtia District ki la sam khusnam sha ka lahduh bad kynhun ba wan ba-ar kumjuh ka khusnam shimet.
Ïa ka nam Player of the match la ïohpdiang da u Fadical Pohshna rang-ïalehkai ka Diengshyn-rum SC, ka Player of the Tournament ka leit sha u Josme Ryngkhlem na ka Wahïajer Narpuh YSSC, Goalkeeper of the Tour-nament sha u Yoomeki Dkhar jong ka Shilliang Umshong SC, ïa ka Top Scorer of the Tournament la ïoh da u Henjoymang Khongsai na Shilliang Umshong SC uba la thep 8 kol ha kane ka aïom, Goal of the Tournament la ïoh da u Hikaidame Bareh rangïalehkai ka Rymbai Synrang Shah-khaiñ SC, katba ïa ka nam Best Team la ïohpdiang da ka Wahïajer Narpuh YSSC.
