Shillong, Naiwieng 24
U nongaiktien ka Bharatiya Janata Party (BJP-Meghalaya), Bah Mariahom Kharkrang u la ong ba ka jingshah rem noh jong ka BJP ha man ki ilekshon hapoh ka Jylla ka dei namar ka jingshah kynnoh sngew niam, wat la u la ong ba ka seng kan sa ïaleh pyrshah ïa kane ka bynta.
“Ki don shibun kiei-kiei kiba la bakla bad mynta ka sienjam ka long ban shong bad khmih bniah bad ban wad hangno la bakla bad lehse ngi lah ban pynkylla ïa ka buit treikam halor kumno ngi ïalap hapoh ka Jylla naba bunsien man ba don ilekshon, ka don beit ka jingshah kynnoh sngew niam bad mynta ngin hap ban ïaleh pyrshah ïa kane,” ong u Bah Kharkrang haba kren sha ki lad pathai khubor ha ka Sngi Saitjaiñ.
U la ong ruh ba wat la ka seng ka la pyrshang ïa kane ha ka ilekshon jong u snem 2023, hynrei dang don shuh shibun kiei-kiei kiba ka seng kan hap ban leh.
Ha kajuh ka por, u la ong mynta ka sienjam nangne shakhmat ka long ba baroh ki nongïalam rangbah jong ka seng kin hap ban shong ban khmih bniah ïa ki jingduna bad hadien kata, yn hap shim ïa ki lynti ban pynbeit ha shuwa ban wan sa kiwei pat ki ilekshon.
Haba kylli, u la ong, “Haba peit ïa ki jingkheiñ ba ngi ïoh, hooid…bad kumta ka don bun bah ka kam kaba ngi hap ban leh namar lada kren badno-badno, baroh kin mynjur ba lada don ka BJP, ka roi ka par kan wan namarba ki la ïanujor ha kano ka rukom ka Jylla jong ngi ka kiew lada phai bad kiwei pat ki Jylla.”
“Hynrei tang ha shuwa jong ka ilekshon, ha shuwa ban thep ‘vote’, kata ka jingshah kynnoh sngew niam ka ju mih. Kumta, kane ka la jia la slem bad nga sngew ba mynta, na bynta ka ilekshon ban wan, ngin hap ban trei minot kumno ban ïaleh pyrshah ïa kane,” u la ong.
Ha ka Sngi Saitjaiñ ba la pynbna ïa ka risol jong ka ilekshon shiteng samoi ha Gambegre, ka Dr. Mehtab Chandee A. Sangma na ka NPP, kaba dei ka kurim jong u Myntri Rangbah ka Jylla, u Conrad K. Sangma, ka la ïoh haduh 12678 ‘vote’ bad jop da 4594 ‘vote’ ïa ka kyrtong ka TMC, ka Sadhiarani Sangma kaba dei ruh ka kurim jong u Myntri barim, u Zenith Sangma, kaba la ïoh 8084 ‘vote’, katba u kyrtong ka Congress, u Jingjang Sangma u la ïoh tang 7695 ‘vote’.
Haba phai sha 3 ngut kiwei pat ki kyrtong kiba la ïakhun ha kane ka ilekshon – u Bernard Marak ka BJP u la ïoh tang 710 ‘vote’, u Jerry Sangma kum u kyrtong shimet, u la ïoh 706 ‘vote’ bad u Sengkrabirth Marak, kyrtong shimet u la ïoh tang 147 ‘vote’ bad 95 tylli ki ‘vote’ ki la leit sha ka NOTA.
