Amlarem, Naiwieng 25
Ka Amkoi, FB Satpator, Twah U Sdiah bad Lynshiang Amsyrwai ki la ïoh jingjop ha ka lympung ïalehkai Upper Division bad Lower Division Football Tournament ba la pynïaid da ka Amlarem Sub Divisional Sports Association (ASSA) ha ka Lah Sngi U Blei ha Mini Stadium Ladpajlem kaba ha Amlarem.
Ha ka jingïakhun jong ka Upper Division, ka Amkoi ka la pynliem noh da 2-0 kol ïa ka Ammutong. Ïa kine ki kol jong ka Amkoi la thep da u Lovis Pohtam ha ka minit kaba 54 bad Jong Robert Lamin ha ka minit ba 73.
Haba phai sha ka Lower Division, ka FB Satpator ka la pynliem noh ïa ka Ryntih Amsohrhong da 1-0 kol bad ïa kane ka shi kol la thep da u Dikaisiang Pasyad ha ka minit kaba 23.
Ha ka jingïalehkai kaba bud, ka Twah U Sdiah ka la pynliem da 2-1 kol ïa ka Traki Mawngap. Tang mar ïasdang ka jingïalehkai ka Traki Mawngap ka la pynkhih jar nyngkong lyngba u Hopeson Langshiang ha ka minit kaba 9, hynrei ka Twah U Sdiah ka la lah ban pynphai kylla ar kol lyngba u Absalon Nyalang ha ka minit ba 43 bad 56 na ka bynta ban khur syndon ïa ka jingjop.
Ha kawei pat ka jingïalehkai ka Lynshiang Amsyrwai ka la pynliem ïa ka Nongbareh Lyntiar da 1-0 lyngba ka kol ba la thep da u Amos Langshiang ha ka minit kaba 9.
