Raphael Warjri
Ki niam jong ka pyrthei shityllup ki dei ki ba pynkhraw ïa la ki matti longblei (divine entity) ba la pynkup da ka dur lajong kum ki briew, bad kaba kham kynrei hi ka long ba dei u shynrang kum u kynja blei bakhraw bad ba donbor tam eh. Kane ka phalang ba ka dei na ka pyrkhat briew ba la pynman blei ïa u jynthaw ba kup kum ka dur briew lajong. Lada shim ïa ka niam Hindu la ju nam ïa uta u Bhagwan kum U Blei badonbor tam, wat la kynthup shi byllien ki bleithaw shynrang bad kynthei lane wat ki mrad ruh, hynrei ki ba ha kliar duh bunsien dei ki shynrang kum u Vishnu, Shiva, Ram, Krishna ter ter. Ha ka niam Muslim ka ba ym ju don ka tynrai ban thawdur, hynrei ïa u Allah kum U Blei ba donbor tam la pynkup da ka snap briew dur shynrang. Ka niam Khristan ruh ka ñiew ïa U Blei ba donbor tam kum u shynrang, nangta ia U Blei laiwei (trinity) la nam ïa U Blei- u kpa, U Blei- u khun, kata u Jisu Khrist bad U Blei- u mynsiem bakhuid, ha ka ba baroh laiwei dei ki shynrang. Ka niam Buddhist ruh ki mane ïa u Buddha u ba dei u shynrang, ka niam Sikhism ruh ki mane ïa u Guru Nanak uba dei u shynrang. Kumta kiwei kiwei ki niam ruh lada buddien lah ban shem bunsien ba dei u shynrang uba kup ïa kata ka nam bakhraw bad ba donbor tam kum U Blei.
Hynrei ha ka pyrkhat niam ki Khasi, uta ne kata ka snap longblei bakhraw bad ba donbor tam dei kaba ym dei shynrang ne kynthei, shimet ne shibyllien, namar ba la synrop lang naphang kum kawei ka snap longblei. Ha ka ba pynkha ïa ki jynthaw ha ka lisan bad ha ka pyrthei ruh ka pyrkhat niam Khasi ka kdew marryngkat ïa ka Meihukum bad ïa u Thawkur kum ki shijur ki riewblei kiba la pun la kha ï ki jynthaw baroh phar ha pyrthei. Kane ka phalang ruh ha ka pyrthei jong ki jynthaw bad jong ki bynriew ba ki don u Thawlang bad ka ïawbei kum ki tynrai ba pun ba kha ïa ka pateng longbriew manbriew kiba roi bad ïai roi khlem pud.
Kumba ka pyrkhat longblei Khasi ka long kaba ïar bad kdup salonsar ïa ka longbriew manbriew shityllup kynthup ruh ïa ki mrad ki mreng, ki sim ki doh, ki khñiang ki ksiah bad ka mariang satlak, kumta ruh ka pyrkhat longbriew ka long kaba ïar bad kaba kdup salonsar ïa ki bynriew baroh ha shityllup ka pyrthei. Ka phangma satlak pyrthei (worldview) jong ka pyrkhat Khasi ka synrop naphang ïa kiei kiei kiba bha baroh kum ka snap longblei kaba khlem kheiñ marwei ne shibyllien, kynthei ne shynrang bad la nam ïa kata ka matti longblei kum Blei, U Blei, Ka Blei bad Ki Blei. Kumjuh ruh ka phangma satlak pyrthei jong ka pyrkhat Khasi ka synrop naphang ïa ki bynriew baroh ha shityllup pyrthei ba la jer ki Hynñiewtrep Hynñiewskum. Kaba sngew diaw ka long ba ki paidkar ki paidbhur jong ka jaitbynriew ki pyrshang ban pynkhim ïa kane ka saiñpyrkhat kaba ïar jong ki longshwa manshwa. Ym tang katta byllai na ki paidbah paidsan ruh ki dang jngi ha ka wahduid khlem da tip katno ba ka wahbah ka ïar, khlem da kdew sa ïa ka duriaw bah. Ka pateng ba mynta jong ki samla khyllud khynraw ki dei ban ngam jylliew ïa ka saiñpyrkhat mynnor ban lah ban khajoh sha ka lawei ka ba jngai. Kaei kaei kaba la seng nongrim ki longshwa manshwa naduh kulong kumah ka dei ban skhem ha la ka tynrai, ka dei ban rasong ha la ki ryta bad ka dei ban phalang sha ka lawei ka ba phyrnai.
Lada ki longshwa manshwa ki la ai pateng ka saiñpyrkhat kaba ïar, ym dei ba ka juk mynta kan pyrkhat pynkhim ïa kata ka nongkynti ba kynsai na ka bynta ba ki paidbynriew ha ka Ri kin dang phngaiñ shuh shuh na kaba ju long. Ki don ki daw ba la shah tyllep ha ka bor kynsan na sha shiliang duriaw kaba tynrong bankhia da kaba pynkoh ba ka barim ka dei kaba lah nongra. Ha kane ka rukom ki paidbynriew ki sdang ban tohhoh kumba ïamrem ïa la ka thymmei namar ba la ïuhroit da ki jinghikai ba per ba na shabar. Ka dei ban don ka pansara kaba dok marbiang ba kumno ban tyng-kai ïa ki bynta jong ka mynnor bad kino kiba dei ban kyntait noh. Kumjuh ruh dei ban don ka pansara ka ban khluh ïa kiei kiei kiba thymmai kiba khia thew bad ban kyntait ïa kiei kiei kiba thymmai ki per kum ka rongphong shi-ïa ïa-shai.Lada lah ban long adkar ha ka rukom sngewthuh ba kumno ban byrshem ïa kaba rim bad kaba thymmai kiba long ki khuiñ ba myntoi ïa ka imlang sahlang, kumta ka lah ban tei ïa ka longbriew manbriew. Hynrei lada thurmur ban khleh khawlang ïa kiei kiei kiba per bad ki ba khia thew lada dei kiba rim na ka mynnor lane ki ba thymmai na ka mynta, katta la suwan bad hiar dor ka imlang sahlang.
Dei ban phikir ha kano ka rukom ban adkar ka jingsngewthuh ïa kiei kiei kiba myntoi bad tei ïa ka imlang sahlang. Ha ba ki khanatang ki puriskam purinam ki phalang da ki pharshi ïa ka saiñpyrkhat ba kynsai jong ka jaitbynriew, ym dei ban ñiew kum kaei kaei kaba shisha ha kane ka juk mynta bad dei ban pynshong-ñia ha ka pyrkhat kaba ïar. Ka jingïar jong ka pyrkhat Khasi ba la pynshong nongrim katkum ka phangma satlak pyrthei ka dei ban kyrsoi ïa ka dohnud kaba kylluid ban pdiang ïa ka jingshisha ba ki longshwa manshwa ki la seng ñia ïa ka saiñpyrkhat.
