Antalya, Naiwieng:
Ha kawei ka durkhih ba la ioh ring da ki paidbah kiba sakhi ia kawei ka jingjia, la ong ba la iohi ia kawei ka liengsuiñ kaba la kem ding ha ka Kad Liengsuiñ Antalya jong ka Turkey ha ka Sngi U Blei, ha kaba ki paidbah kiba shong hapoh jong katei ka liengsuiñ Sukhoi Superjet 100 kaba kit ia ki 89 ngut ki nongleit jingleit bad 6 ngut ki dkhot ba dei khmih hapoh ka liengsuiñ, ki la lait im lut baroh na katei ka jingjia. La suba ba ka daw jong ka jingkem ding katei ka liengsuiñ ka dei namar ba u nongpynher jong katei ka liengsuiñ u la kum pynhiar eh than ha ka por ba hiar sha madan bad kaba la pynlong ia kawei na ki kor engine jong katei ka liengsuiñ ba kan julor bad kem ding.
Hynrei, la ong ba watla ka ding ha katei ka liengsuiñ ka la klang bad ka la pur stet bha, ym shym la don pat kiba ngat ne mynsaw wat tang uwei ruh namar ka jingkloi jong ki bor pynïaid ban pynmih noh ia ki pasenjar kiba shong hapoh baroh.
Ha katei ka sngi, ka tnat ba dei khmih ia ki liengsuiñ ka la pynbna ba katei ka liengsuiñ SU95, kaba dei jong ka Azimuth Airlines bad kaba mih na Sochi ban leit sha Antalya, ka la kem ding noh ha ka por ba la poi ha Antalya hynrei ka long kaba donbok ba ym shym la don kiba ngat ne shah ktah ha katei ka jingjia.
