Shillong, Naiwieng 25
Ka lympung ïalehkai Shillong Premier League 2024 kan btang biang naduh ka Sngi Balang (27 tarik) ha SSA Stadium kaba ha First Ground, Polo.
Ha katei ka sngi kin don haduh lai tylli ki jingïalehkai ki ban sdang naduh ka por 11:30 mynstep haduh por kem dum. Ki kynhun ki ban ïalehkai nyngkong kin long hapdeng ka Nangkiew Irat pyrshah ïa ka Shillong Lajong (11:30 mynstep), kumjuh ka Laitkor SC ïa ka Rangdajied United FC ha ka por 2:30 nohphai sngi, katba ka lahduh jong ka aïom ba la dep, ka Mawlai SC pyrshah ïa ka Nongrim Hills ha ka por 5:30 janmiet.
Kane jingbteng biang ïa ka SPL ka long halor ka jingsangeh shwa shipor namar ka Santosh Trophy hadien ba la lah ban pyndep ïa ki jingïalehkai group, katba ïa ka wat khatduh (final round) yn pynlong hapdeng jong u Nohprah mynta u snem bad ka Meghalaya ka la ïoh rung sha ka wat khatduh.
Kane ka jingpynlong kham bun ki jingïalehkai ha ka shi sngi ka dei na ka daw ka jingbym lait katei ka madan namar ka jingpynlong ïa ki jingïalehkai ïalehkai I-League ha la ïing (home matches) jong ka Shillong Lajong.
Kumba ka paw ka Shillong Lajong bad ka Mawlai ki dang dei ki kynhun kiba dang bat ïa ka kyrdan ba hakhlieh da kaba ïoh mar 7 point, hynrei ka SLFC ka la tam lyngba ka jingïapher kol. Ïa ka kyrdan balai la bat da ka Laitkor wat la ka la ïaryngkat mar 6 point bad ka Nongthymmai kaba la don ha ka kyrdan basaw. Ïa ka kyrdan ba shatrai la bat da ka Rangdajied United bad ka Nangkiew Irat kiba ïaryngkat mar 3 point na ki lai sien ïakhun.
