Shillong, Naiwieng 25
Ka President jong ka synjuk ki nongdie madan ba la tip kum ka Meghalaya Greater Shillong Progres-sive Hawkers & Street Vendors Association (MGS PHSVA) ka Kong Biolin Pyrtuh ka la ïathuh ba ha ka 23 tarik u Naiwieng 2024, naduh ka por mynstep haduh ka por kynjat shai jong ka 24 tarik u Naiwieng 2024, ki la shong ha Khyndailad ban pynpaw ïa ka jingpyrshah halor ka jingthmu jong u Myntri ka tnat jngohkai pyrthei ka Jylla, Bah Paul Lyngdoh ban weng noh ïa ki nongdie madan na Khyndailad ha ka 24 tarik u Naiwieng 2024. Pynban haba ka nongdie madan ki la ïai ap ha katei ka sngi ba la thmu ban weng ïa ki na katei ka jaka, ym shym don satia mano-mano ruh ba la wan.
Ka Kong Pyrtuh ka la ong ba ka jingap jong ki nongdie madan ha katei ka jaka ha katei ka sngi kam dei satia ba ki tieng ïano-ïano hynrei ka dei tang ka jingap ban ïoh ïa ka jingshai na u Myntri namar na ka liang jong ki, ki la pynpaw ïa ka jinglyngngoh kumba u Myntri ruh u la lyngngoh ha kaba ïadei bad ki briew kiba la shong jingïalang bad u Myntri namar na ka liang jong kitei ki nongdie madan kim tip satia shaphang kita ki briew kiba shong jingïalang bad ong ba u Myntri u dei ban pynshai sha ki halor ka jingdon jong kita ki nongïalam ka kynhun ki nongdie madan kiba la shong jingïalang bad u.
“Ngim dei ba ngi ap ïa u Bah Paul ba ngi tieng hynrei ngi la ap namar ba ngi kwah ïa ka jingshisha na u khnang ba un pynshai ïa ngi namar ma ngi ruh ngi lyngngoh ban ïohsngew ba ma u ruh u lyngngoh, te ngi ruh ngi lyngngoh keiñ ban tip ba kiei kita ki nongïalam jong ki nongdie madan kiba la dep ban shong jingïalang bad u Bah Paul”, ong ka Kong Pyrtuh.
Ka Kong Pyrtuh ka la ong ba lada utei u Myntri u wan ban kyndang ïa ki nongdie madan da ka bor ha kano-kano ka por, na ka liang jong ki nongdie madan kin ym ailad satia ïa u bad ong ba ki la long kiba la pynkhreh.
Shuh-shuh ha kaba ïadei bad kane ka jingpynkynriah ïa ki nongdie madan na Khyndailad, ka Kong Pyrtuh ka la ong ba na ka liang ka Town Vending Committee (TVC) kam pat rai eiei halor kane ka bynta bad ka jaka kaba biang ruh kaba lah ban pynrung ïa baroh ki nongdie madan kam pat don satia. Kumta na ka liang u Myntri um pat lah ban pynkhih ïa ki na katei ka jaka.
“Katba ka Town Vending Committee kam pat rai ba kan peit ïa ka jaka kaba biang hangno ba ngin rung baroh khoit, u Bah Paul um pat lah ban pynkhih ïa ngi nangne”, bynrap ka Kong Pyrtuh.
Ka la ong ruh ba lada kin phiah ïa ki kumba kha khun ka miaw, kin ym leit da lei-lei hynrei ki dei ban pynrung lang ha kajuh ka jaka kaba biang kata ruh ka dei hapdeng jong ka sor bad tang ka TVC kaba lah ban ai jaka ym dei mano-mano.
