Raipur, Naiwieng:
Hadien ba la jia ka jingshah pynïap jong ki Maoist ha ka jingïasiat bad ki shipai ka District Reserve Guard (DRG) ha Sukma jong ka Chhattisgarh ha ka Sngi Saitjaiñ, u Deputy Chief Minister Arun Sao ha kine ki khyndiat sngi ba la leit u la ong ba da ka jingpyrshang jong ki bor pahara ka Bastar shen kan lait na ki Maoist.
“Ki bor pahara sa shisien pat ki la ïoh ïa ka jingjop ha Sukma. Nga kwah ban ai khublei ïa ki briew na ki bor pahara. Hadien ba ngi la thaw ïa ka sorkar, ki bor pahara ki la pynlong katto katne ki jingtreikam wat ha ki jaka kiba kham ïakynduh jingeh. Da ka jingpyrshang jong ki bor pahara, ka Bastar shen kan sa lait na ki kam pyntriem bad na ka jingleh donbor jong ki lehnoh Maoist bad ka jingsuk kan sa leit phai biang ha ka thaiñ ha kaba kan sa don ka roi ka par,” la ong u Arun Sao ha ka jingïakren bad ki nongthoh khubor.
Katba u Kamlochan Kashyap, DIG South Bastar u la ïathuh ba la thmu ban pynlong ïa ka jingkhynra lang hadien ba la ïoh jingtip halor ka jingïaid jong kawei ka kynhun lehnoh Maoist ha katei ka thaiñ.
“Naduh ka taïew ba la dep, ngi la ïoh jingtip ba ka don ka jingshang jong ki dkhot ka kynhun ki Maoist. Ngi la thmu ban pynlong ïa ka jingkhynra lang. Ha ka step jong ka Sngi Saitjaiñ, ka la don ka jingïakynduh bad ngi la jop da kaba ïoh siat ïap ïa ki 10 ngut ki Maoist. Ngi la ïoh kurup ruh ïa ki suloi AK-47, 100). SLR Rifles bad kiwei kiwei ki tiar ïaleh,” la ong u Kashyap ha ki nongthoh khubor.
Ha shwa kane ka sngi, u Myntri Rangbah ka Chhattisgarh, u Vishnu Deo Sai, u la ai ka jingïaroh ïa ki bor pahara, namar ka ‘jingshlur bym lah ban pyndem’ bad ka ‘jingshimkhia’ jong ki, hadien ba ki la jop bad pynliem ïa ki 10 ngut ki Maoist, hapoh ka jingkhynra ha Sukma distrik.
U Myntri Rangbah u la pynpaw ba kane ka jingjop jong ki bor pahara ka long kaba dei ban ai jingïaroh, namar ba ka sorkar jylla ka dang bteng ïa ka jingïakhun kaba jur pyrshah ïa ka jingsynshar Maoist, da kaba bat ïa ka jingpyntreikam ban ïakhun pyrshah. U la ïai ban da kaba ong ba la pyntikna ban wanrah ïa ka roi ka par bad ka jingai jingshngaiñ bad ki lad jingïada na ka bynta ka thaiñ Bastar ha kaba kane ka jingthmu ka long ka mat kaba hakhmat eh ba la buh da ka sorkar jong u. “Da kaba pyni ïa ka jingshlur bym lah ban pyndem, ki bor pahara ki la shim ïa ka sienjam kaba khraw ban ïakhun pyrshah ïa ki Maoist ha ka distrik Sukma ha katei ka step bad pynïap ïa 10 ngut ki Maoist ha ka jingïa pyni bor kaba markylliang. Kane ka jingjop ba la ïoh da ki shipai ka long kaba dei ban ai jingïaroh.
Ka sorkar jong ngi ka ïaleh tyngeh pyrshah ïa ki Maoist da kaba trei ïa ki kam ba la buh. Ka jingpynthikna halor ban wanrah ïa ka roi ka par, ka jingsuk bad ka jingshng-aiñ ha Bastar ka dei ka mat ba hakhmat eh jong ka sorkar jong ngi,” la thoh u Myntri Rangbah Deo Sai ha ka jingpyllait khubor ha ka rynsan X.
