Shillong, Naiwieng 25
Ka Sorkar Jylla ka la mang pisa haduh T.500 klur na ka bynta ban pyntrei ïa ka skhim sam um kaba la tip kum ka New Shillong Township Water Supply Scheme (NSTWSS).
U Myntri ba khmih ïa ka tnat PHE u Marcuise N Marak haba pyntip ïa kane ha ka Lah Sngi U Blei, u la ong, “Ïa ka New Shillong Township Water Supply Scheme, ngi la dep pyllait ïa ka ‘tender’ ba kot kumba T.500 klur. Ngi la dep ai ïa ka ‘work order’ bad ka kam ka la sdang ïaid”.
U Myntri u la ong, kan long kaba eh ban ai kam lang ïa ki kontraktor trai jaka lada ka Sorkar ka pyntreikam ïa ki kor ki bor bathymmai ka juk haba pyntreikam ïa kum kine ki projek. Kane ka jingpynpaw u Myntri ka la long hadien ba ka la don ka jingpynpaw jingsngewkhia da ki kontraktor trai jylla.
“Ngi ïatip bha ïa ki kam kiba donkam da ki kontraktor jong ngi ruh hynrei na ka bynta ka synshar khadar kaba biang bad na ka bynta ka lawei jong ka Jylla jong ngi, ngi hap ban ïaid katkum ki kor ki bor ka juk bad lada ngi ïaid katkum kine ki kor ki bor thymmai, kan long kaba eh ban aikam lang ïa ki kontraktor trai jylla,” u la ong.
“Ngi la pyndonkam ïa ki kor ki bor ka juk mynta. Ngi la pyndonkam ïa ka Skada System ïa ka NST ha kaba ka Internet kan treikam haba bthei ki pipe, ka ban pynsuk ïa ki nongtrei ka PHE ban lap bad leh ïa kaba donkam khlem ka jingpynslem. Ta ka daw ngi donkam ban pyndonkam ïa kine ki kor ki bor ka juk kaba ki kontraktor jong ngi kim pat don ïa ka jingnang jingtip,” u la ong.
Shuh shuh u Myntri u la ong, ka tnat ka la buh ïa ka jingtyrwa ban ïoh jingmynjur na ka Kynhun Myntri ban leh eiei halor ki jingeh ba ïadei bad ka jingsam ïa ka umbam umdih ha Sor.
“Ka PHE ka dei kaba peit ïa ka jingsam um ba bun bad ka SMB ruh ka don bynta ha ka jingsam um. Ngam lah ban ong eiei halor ka rukom pynïaid ïa ka jingsam um. Naba bun kiei-kiei ki la mih, ngi hap ban ïakren bad u Myntri Rangbah bad u Myntri ka tnat Pynroi Sor, ngi la pyrshang ban wanrah ïa ka rukom treikam bathymmai la ka dei kaba lah pyntreikam ne em, kane kan dei ka kam ka ban sa ïakren hapoh ka Kynhun Myntri,” la ong u Marcuise.
U la ong ba kum u Myntri ka PHE, u la buh ïa kine ki kam hakhmat u Myntri Rangbah bad u Myntri ka tnat Pynroi Sor bad lada ka Kynhun Myntri ka la pdiang, yn sa lah ban batai shuh shuh shaphang ka rukom treikam kaba thymmai.
