Nongstoiñ, Naiwieng 26
Ka Nongstoiñ Block ka la buh thong kumba 4140 tylli ki ïing PMAY-G ban pyndep shna. Katkum ka kaiphod la ong ba na ki 4140 tylli ba la buh thong, 3238 tylli la pyndep ban shna bad 902 tylli ki dang ïaid shakhmat ban shna.
Kane ka la paw ruh ha ka Lah Sngi U Blei jong ka taïew kaba long ka sngi kaba kham kyrpang na ka bynta ka shnong Nonglwai, Nongstoiñ, hadien ba na ka liang ka ophis jong u Block Development Officer, Nongstoiñ ka la pynlong ïa ka jingïalang ba kyrpang ban rakhe ïa ka “Grih Pravesh” kaba dei ka jingleh burom ba kyrpang hadien ba la lah ban pyndep ïa ka jingshna ïa ki ïing kiba dei hapoh ka skhim Pradhan Mantri Awaas Yojana Gramin (PMAY-G).
Ha katei ka jingïalang ba la pynïaid da ka ophis u Block Development Officer, Nongstoiñ C&RD Block, la donlang da ki kongsan ba kynthup ïa u MLA ka Nongstoiñ, u Bah Gabriel Wahlang kum u kongsan, u Bah MA Challam, ADC WKH, u BDO ka Nongstoiñ C&RD Block, T Diengngan bad kiwei kiwei.
Ha ka jingkren kum u kongsan, u MLA ka Nongstoiñ u la ban jur ïa ka jingdonkam jong ka skhim PMAY-G bad u la kyntu ïa ki nongshong shnong ban jop ïa ka jingsheptieng haba ïadei bad ka jingpynrung kyrteng ha ka Aadhaar.
U la kdew ba bun ki briew ki duh noh ïa ki jingmyntoi na ka Sorkar namar ka jingbym don Aadhaar Card bad u la kyntu ïa baroh ban shim ïa ki lad ban kyntiew ïa la ka jingim.
La pynkut ïa ka jingïalang da ka jingkular Awaas Diwaas lane ka Awaas Diwaas Pledge da baroh kiba don ryngkat ha katei ka jingïalang kynthup ïa ki kongsan bad ki nongshah khot sngewbha.
