Shillong, Naiwieng 26
U rangïalehkai kriket ba dang khynnah na Bihar, u Vaibhav Suryavanshi u la kylla long u rangïalehkai uba dang rit tam ban ïoh ïa ka jingïateh soskular ha ka IPL, ha ka jingsiew kaba T.1.10 klur tyngka (US$0.13 million approx.) na ka Rajasthan Royals (RR).
U Suryavanshi, uba la don 13 snem bad 243 sngi ha ka sngi ba u la ïoh ïa ka jingïateh soskular na ka bynta ka kontrak jong u ha ka IPL. U la pyndep ban ïalehkai na ka bynta ka India ha ka Under-19 bad u la lah ban tied ïa ka shispah ron pyrshah ïa ka Australia U-19 kaba la neh saw sngi ha Chennai ha ki ar sien ba la dep.
Ka jingkhlieh dor na ka bynta u Suryavanshi ka la sdang na ka dor tynrai jong u kaba long T. 30 lak bad kumta ka Rajasthan Royals bad ka Delhi Capitals (DC) ki la ïadon bynta lang ha kane ka bynta (khlieh dor) bad ha kaba kut la ïoh da ka RR.
“U la don ha ka shlem ïalehkai jong ngi ba la tip kum ka high performance center ha Nagpur, ha kaba u la don ki jingpyrshang hangtei bad u la pynsngewtynnad shisha ïa ka rukom hikai jong ngi hangtei,” ong u CEO jong ka RR, u Jake Lush McCrum hadien ba la kut ka ïew die thied rangïalehkai. “U dei uba don sap ha ka kam ïalehkai kriket bad hooid phi dei ban don ka jingshaniah khnang ba un lah ban kiew sha ka kyrdan IPL. Kumta bun ki kam kin leit ha ki bnai ban wan ban bteng ha ka ban ai jinghikai ïa u, hynrei ka long ka kabu ksiar na ka bynta utei u rangïalehkai ba un ïadon bynta bad ka kynhun.”
U Suryavanshi uba dei na Samastipur, ka nongbah kaba jngai kumba 100 kilomitar shaphang shatei lam mihngi na Patna, u la mih madan san sien ha ka Ranji Trophy naduh ba u la mih madan teng ha ka kyrdan ïalehkai ba nyngkong pyrshah ïa ka Mumbai ha kaba sdang jong une u snem bad mynta u dang ïalehkai T20 ha ka Syed Mushtaq Ali Trophy na ka bynta ka Bihar. Dang shen u la ïalehkai nyngkong ïa ka T20 pyrshah ïa ka Rajasthan ha ka 23 tarik mynta u bnai.
Ka jingïalehkai kaba khraw tam jong u haduh mynta ka dei ka jingïalehkai pyrshah ïa ka Australia (U-19), kaba la mih tang na ki 58 tylli ki bol, ha shwa ba un ïoh tied ïa ka 104 ron. Katei ka jinglah ban ïalehkai bha ka la pynlong ïa u Suryavanshi kum u rangïalehkai ba dang khynnah tam – ha ka rta kaba 13 snem bad 187 sngi – ban khyrwit ïa ka spah ron ha ka jinglong khynnah bad ban pynkheiñ ïa ka rekod ba mynshwa kaba 14 snem bad 241 sngi da u kapten ka Bangladesh u Najmul Hossain Shanto.
U Suryavanshi u ïoh ruh ban tied haduh lai tylli ki shispah run (332 run khlem shah pynkhyllem) ha ka lympung kyrdan ïalehkai U-19 ha Bihar, kata ka Randhir Verma Tournament.
U coach ba pura jong u, u dei hi u kpa jong u, u Sanjeev Suryavanshi. U Sanjeev ruh u dei u nongïalehkai kriket, hynrei ynda um lah ban poi sha ki kyrdan kiba kham halor, u la phai sha ka kam hikai kum u coach, bad u la sdang ban ai jinghikai ïa u Vaibhav khnang ba un long uba tyngshaiñ ha ka kam ïalehkai.
