Imphal, Naiwieng:
Ym slem hadien ba ka Sorkar Manipur bad kiwei kiwei ki kynhun seng, kynthup ïa ki seng bhalang, ki spah ngut ki kynthei ha ka Lah Sngi U Blei, ki la dawa ban weng noh ïa ka Armed Forces (Special Powers) Act na ka jylla.
Ki la don da ki spah ngut ki kynthei kynthup ïa kiba dang poh rta bad kiba la san, kiba la ïashim bynta ha ka jingïaid paidbah ha Imphal East district, kaba la pynlong lang da ki katto katne tylli ki seng kiba kynthup ïa ka Manipuri Students’ Federation (MSF), ka Nupi Khunai (Yairipok), bad ka Meira Paibis, ha kaba ki la rah ïa katei ka jingdawa.
Kane ka jingïaid paidbah ka la sdang na Kongba Bazaar hynrei ka kynhun kaba heh jong ki bor pahara ka la pynsangeh hadien 3 km ha Konung Mamang kaba jngai 1 km na Secretariat jong u Myntri Rangbah ka jylla u N Biren Singh bad nangta ki nongïakhih ki la leit phai biang sha Kongba Bazaar bad ki la pynlong ïa ka jingïalang kaba heh.
Da kaba rah ïa ki Banner bad ki Placard, ki kynthei kiba la don bynta ha ka jingïakhih ki la pynrem ïa ka jingshah thombor bad ki la kyntu ïa ki sorkar ban pynthikna ïa ka jingkitkhlieh na ka bynta ki jingpynkheiñ ïa ka hok longbriew manbriew.
Da kaba ñiew ba kane ka aiñ ka long “kaba shyrkhei”, ki la ai ïa ki jingpyrta kiba jam ban phah weng noh ïa ka AFSPA na ka jylla bad ki kynthei ki la kyntu ïa ka sorkar jylla bad ka sorkar kmie ban shim ïa ki sienjam kiba biang ban sangeh noh ïa ka jingpynïap ïa ki briew kiba lui lui ha ka jylla jong ka thain Shatei-lam-Mihngi.
