Amlarem, Naiwieng 26
Ka Amlarem SC, Sohkha Shnong Everlasting bad Padu Masku ki la ïoh jingjop ha ka Super bad Lower Division Football Tournament ba la pynïaid da ka Amlarem Sub Divisional Sports Association (ASSA) ha ka Sngi Ba-ar ha Amlarem.
Ha ka jingïakhun jong ka Super Division, ka Amlarem SC ka la pynliem da 4-0 kol ïa ka Umladkhur SC. Ïa kine kol la thep da u Tip Rasmut (9 & 49) bad u Wanki Pohthmi (47 & 83).
Ha ka jingïalehkai jong ka Lower Division hapdeng ka Hynriam SC bad Jarolod SC ki la ïasam mar shi point hadien ba ki la ïakhaid mar 1-1 kol. Ïa ka kol jong ka Hynriam la thep da u Triostar Kassar ha ka minit kaba 31 bad ïa ka Jaraload la thep da u Ashe Kassar ha ka minit ba 39.
Ka Sohkha Shnong Everlasting ka la pynliem da 4-1 kol ïa ka Amsohrhong United. Ïa ki kol jong ka Sohkha la thep mar ar kol da u Michael Langar (2 & 43) bad u Arnest Lyngdoh (7 &24), katba ïa ka kol jong ka Amsohrhong la thep da u Merson Shylla ha ka minit ba 35.
Haba phai sha kawei pat ka jingïalehkai, ka Padu Masku ka la pynliem noh ïa ka Lajaplem da 2-0 kol. Ïa kine la thep da u Wandilang Pohshna ha ka minit kaba 27 bad u Rimiki Pohshna (45).
