Shillong, Naiwieng 26
Ka Myntri ka tnat ka Koit ka Khiah ka Jylla, Dr. Mazel Ampareen Lyngdoh ka la ong ba ka Sorkar Pdeng ka dei ban pyrkhat noh ban thung da u/ka Vice Chancellor da kiba dei na kane ka Jylla kiba sngewthuh kham bha ïa ka jinglong-jingman hapoh ka skulbah North Eastern Hill University (NEHU).
Ka la ong ba ka long kaba donkam ïa ka Sorkar Pdeng ban ïasyllok ruh bad ka Sorkar Jylla ha ka rukom thung kam hapoh ka skulbah khamtam ka jingthung ïa u/ka Vice Chancellor.
“Ka long ka jingshisha ba ka jingthung kam, kam long katkum ki kyndon ba la buh. Kan bha shibun ban ailad ïa ki trai Jylla kiba la kot ka kyrdan ba kin shimti ha ka kyrdan ka ban ai jingmyntoi ïa ka Jylla. Ka Sorkar Pdeng ka buh ïa ki skulbah ha bun ki Jylla ym ban myntoi ïa ka, hynrei ban ai jingmyntoi ïa kito kiba ïoh ïa ka skulbah”, la ong ka Myntri.
Ka Kong Ampareen ka la pynpaw ruh ba ka kyrshan ïa ka jingïakhih jong ki samla pule watla kam pat pule bniah ïa ki mat ba ki dawa, da kaba bynrap ruh ba kane ka jingïakhih jong ki samla pule ka dei hadien ba ki la shu shah bad sngap da ki bnai bad ki snem.
“Kam ïahap ba ngan tuklar, hynrei nga ngeit ba ka NEHU ka dei ban ai ka jingshakri kaba bha ïa ki samla pule, wat ïaid lait na ki samla pule halor ki rai ba donkam, lem kumta kin mih biang kum kine ki jingeh”, ka la ong.
Ka Kong Ampareen kaba dei ruh ka nongaiktien jong ka Sorkar MDA-II, ka la ong ba ka Sorkar Jylla kam lah ban tuklar ïa ki kam ha NEHU namar ka hap hapoh ka jingpynïaid ka Sorkar Pdeng, hynrei ka Sorkar Jylla ruh ka peit-thuh bha bad kum ka nongai jaka ban buh ïa ka NEHU hangne, ka Sorkar Jylla ka dei ban don ïa ka hok ban ai rai lang ha kiba bun ki bynta kiba ktah ïa ka Jylla.
“Da ka jingïasyllok lang bad shim ruh ïa ka jingai jingmut jong ka Sorkar Jylla kan pyllait na ka kynrum-kynram kumba la mih mynta, bad lah ban wanrah ki jingmyntoi ïa ka skulbah hi baroh kawei”, ka la ong.
Ka Myntri ka la pynpaw ïa ka jingkyrmen ba ka kynhun tohkit kaba la thung da ka Sorkar Pdeng kaba la wan ban tih bniah ïa kaei kaba jia, bad ban pynbeit ïa ki kynrum-kynram ha NEHU, kan ai ka kaiphod kaba khlaiñ bad kaba skhem ban pynbeit ïa ki jingeh ha kane ka skulbah.
