Nongpoh, Naiwieng 26
Ki nongïalam jong ka shnong Belahari ha ka thaiñ Jirang, ha ka Sngi Ba-ar ka la mih ban pynshai paidbah halor ka khubor kaba la mih ha kine ki khyndiat sngi ba ka shnong ka la shim ïa ka rai ban beh shnong ïa ka Kong Morias Rani halor ki kam pyrshah ïa ka shnong, da kaba pyntip ba ka shnong hi kam pat shim ïa ka rai beh shnong, hynrei ka la shu sospon shipor ïa ka jinglong nongshong shnong jong ka hapoh ka shnong Belahari.
Ki Nongïalam jong ka shnong ba kynthup naduh u Rangbah Shnong, Bah Peter Stone Syngkli, u Secretary Shnong, Bah Khrawpyrkhat Rani, u Rangbah Shnong barim, Bah Active Pator haba kren sha ki lad pathai khubor ki la pynshai paidbah ba katei ka jingmih khubor ba la beh shnong ïa ka Kong Morias Rani, ka dei tang ka sur jong ki paidbah, hynrei na ka liang ka Executive Committee jong ka shnong kam pat shim satia ïa katei ka rai, hynrei ka la shu sospon bad ai por san sngi, kata haduh ka 29 tarik mynta u bnai Naiwieng ïa ka Kong Morias Rani ba kan wan mih bad ïakren bad ki paidbah nongshong shnong halor katei ka kynrum-kynram bad ka jingeh ba ka shnong ka don bad ka. Lada kam wan shakhmat ban ïakren pynbeit, na ka liang ka shnong kam banse ban shim pat da kiwei ki lad kiba kham tyngeh.
Kitei ki nongïalam ki la ïathuh ba katei ka kynrum-kynram hapdeng ka shnong pyrshah ïa ka Kong Morias Rani ka dei namar ka jingkynnoh ba kane ka longkmie ka la ïaleh pyrshah ïa ka shnong da kaba register tuh ïa ka khlaw shnong kaba don ha khappud bad ka jylla Assam khlem ka jingïoh jingbit na ki nongïalam shnong bad haba ka shnong ka thmu ban wanrah ïa ki kam pynroi kum ha ka ban shna surok bad kiwei kiwei, katei ka longkmie ka ju pynthut bad leit pynban ban ujor sha ki pulit jong ka jylla Assam.
Kitei ki nongïalam shnong, ki la ïathuh ruh ba ka Kong Morias ka dei kaba mih na ka shnong Belahari la da ki phew snem bad sah sha ka jylla Assam bad u lok bar jylla. Hadien ka jingwanphai biang ka jong ka, la pdiang biang ïa ka kum ka nongshong shnong u snem 2010-11. Dei naduh u snem 2011 ba katei ka longkmie ka la sdang ban leh ïa kitei ki kam ban pynthut ïa ka kam shnong kam thaw, kaba ki la kynnoh ruh ba ka dei ka jingaibuit jong utei u lok bar jylla jong ka.
Shuh shuh, ki nongïalam shnong ki la ïathuh ruh ba katei ka khlaw shnong kaba ka Kong Morias Rani ka la dep ban register tuh, ki la pynshai ba katei ka khlaw kam dei satia ka nongkynti shimet jongno-re-jongno bad ym don satia kiba lah ban kam trai naba ka dei ka khlaw shnong kaba la long trai hi da ki paidbah nongshong shnong baroh. Da ka jingleh jong ka Kong Morias Rani kumne ka la pynbitar bad pynlong ïa ki paidbah haduh u pud ba ki la kwah ban beh shnong noh ïa ka.
