Shillong, Naiwieng 26
Ka Nongkrem Youth Development Association (NYDA) ka la mih shakhmat ban shim ïa ka lyngkor ha ka ban ïalap pyrshah ïa u drok bad ki jingsniew kiba mih na une u jingdih buaid ha Nongkrem.
Kane ka Seng ka la pynlong dang shen ïa ka jingïalang pynsngewthuh paidbah ba 7 sngi lynter shaphang u drok bad ki jingdih pynbuaid ha ryngkat ka jingïatreilang bad ka Nehru Yuva Kendra Sangathan, East Khasi Hills, Shillong.
Ïa kane ka prokram la pynlong ha Youth Cultural Centre cum Community Hall, Iewpyrsing, Nongkrem naduh ka 22 tarik Naiwieng bad kan kut haduh ka 29 tarik Naiwieng-kaba la pynlong halor ka phang “Awareness & Education Programme on Drugs Addiction & Substance Abuse”.
Ïa kane ka prokram la pynïaid da u President ka NYDA Bah Wanlang Mylliemngap bad la plie da u Deputy Director ka Nehru Yuva Kendra Sangathan Bah D Rapsang.
Ki nongai jingkren ha kane ka prokram ki kynthup ïa ka Kong M Wahlang, Counsellor New Hope De-Addiction Centre, Bah Shanskhem Marbaniang na ka Khasi Jaintia Presbyterian Synod Sepngi Urban Mission, Kong Medalin Lyngdoh na ka Next Space Organisation, Dr. JK Henry bad kiwei kiwei.
Ki nongkren ki la ai ka jingbatai kaba bniah ha kaba ïadei bad ki jingsniew kiba shyrkhei kiba ka imlang sahlang ka ïakynduh da ka jingkynrei ka jingpyndonkam ïa u drok bad kaba lam ruh sha kiwei pat ki jingsniew kum ka HIV bad ka jingpang AIDS.
Ki nongïashim bynta ha kane ka prokram ki long ki khynnah skul na ka Salem Higher Secondary School, ka Nongkrem Higher Secondary School, ka Pahsyntiew Memorial Secondary School, ki Bachelor of Social Work na Women’s College Shillong, Martin Luther Christian University, IIPS, ki dkhot jong ki Seng Samla bapher bapher bad kumjuh ruh ki dkhot jong ka seng. Ha kane ka prokram ka NYDA kan ïoh ruh ban leit ïa ka Door to Door Campaign halor kane ka phang.
Ka NYDA ha kajuh ka por, ka kyntu ïa baroh ki paralok parajor, ki marjan marpa ba kin sngewbha ban shimkhia ban ïaleh ban pynduh ïa kine ki jingsniew kiba la ïoh ban suhthied ha ka imlang sahlang kaba lah ruh ban ktah ia ka pateng ka ban sa wan.
