Nongstoiñ, Naiwieng 26
Ka National People’s Party (NPP) Nongstoiñ Block ha ka Sngi Ba-ar jong ka taïew ka la ïoh ban pynskhem pura biang ïa ki nongkitkam bathymmai jong ka NPP Nongstoiñ Block ha kaba u Bah Gabriel Wahlang, MLA u la shimti kum u President bapura hadien katto-katne bnai ba u la rung sha ka NPP.
Ha kane ka sngi la don lang u Bah HM Shangpliang, nongaiktien ka NPP, u Bah Hamlet Dohling Working President ha ka jingdonlang u Bah Macmillan Byrsat MLA barim ka Nongstoiñ ha kajuh ka por kum u District President ka NPP ban pynskhem ïa ki nongkitkam, ha kajuh ka por ban pdiang ruh ïa ki nongbud jong u MLA Bah Gabriel Wahlang kiba dei na ka Congress, kumjuh ïa u Bah Sanjied Kynsai Shangrit kyrtong barim ka HSPDP na Nongstoiñ, u Bah Nicholas Marweiñ CEC Member ka HSPDP bad General Secretary ka HSPDP West Khasi Hills bad kum u Vice President ka HSPDP Nongstoiñ bad kiwei kiwei ha ka jingïalang ba la pynlong hapoh Mecofed Hall Nongstoiñ.
Ha kane ka sngi, ka jingïalang ka la pynsngew bad pdiang ruh ïa ki aplikeshon jong kiba kwah ban ïakhun ïa ka ilekshon MDC na ka NPP na Nongstoiñ konstitwensi, kaba haduh mynta ka la don tang ka kyrteng jong u Babu Dressir Marngar, nonghikai ka Pastorate Laitkseh Christian Secondary School, uba la pan ïa ka tiket. Ha kane ka sngi ruh la mynjur ban phah noh ïa ka kyrteng jong u Babu Dressir kum u kyrtong MDC sha u District President khnang ba yn ïoh phah sha ka State ban ïoh ïa ka jingpynskhem.
U Bah Hamlet Dohling haba kren ha ka jingïalang u la ong ba ka seng ka pdiang sngewbha ïa baroh kiba la wan ban rung sha ka NPP la ka long kiba dei na ka Congress, TMC bad HSPDP bad nangne shakhmat la tip noh ïa ki kum shi ïing shi sem ha ka NPP.
U la ong ruh ba baroh ki tip ba ka NPP ka dei ka seng kaba ïalam ïa ka synshar-khadar hapoh ka Jylla bad kano-kano ka seng kaba ïalam ïa ka synshar-khadar wat mut ba kan ïaid ha ka lynti kaba jem jai, wat mut ba baroh-baroh kin ïaroh kin ïa thap-kti, kam dei kaba suk ban pynïaid bad ïalam ïa ka Sorkar, bun bah ki jingeh bun bah kiba kwang ktieh, kiba kwang maw khamtam ïa ka seng kaba ïalam ïa ka Sorkar hynrei donbok shibun ba ki don ki Nongïalam ba wat hapdeng ki jingeh ki jingshah kawang ktieh kim ju pynsngew, ki peit beit ïa ka thong.
“Phi lah ban sakhi ba kane ka jinglah jong ka NPP bad khamtam ki Nongïalam jong ka ban ïaid ha ka lynti ban tei, bad kane kan dei na ka jingkiew jong ki MLA na ka 26 ngut kaba la jop ha u 2023, mynta ngi la poi sha ki 32 ngut. Kane ka pyni ïa ka jinglong rangbah ki Nongïalam bad kum ka seng ruh ka ju shim beit ïa ka jingai jingmut kiba bun balang,” la ong u Bah Hamlet.
