U MP ka Tura u Saleng A Sangma u la pynpaw ba ka Delhi ne ka Sorkar Pdeng kam ju kheiñ snep satia ïa ka thaiñ Shatei Lam-Mihngi ne ban phai khmat haba ki mih kino-kino ki jingjia kum ka jingïakynad ne ki kynrum-kynram. Halor kane ka jingleh ka Sorkar Pdeng, u Saleng u la buh ruh ka jingkyntu sha baroh ki MP bad kumjuh ki Myntri Rangbah jong Jylla ka thaiñ Shatei Lam-Mihngi ban ïatylli kawei ban pynsngew ïa ki jingeh kiba bun kiba kum ka thaiñ hi baroh kawei ka mad, khamtam kum ka jingjia ha Manipur ha kaba da ki spah ngut ki briew ki la ïap bad wat ruh ka jingmih ka kynrum-kynram hapoh ka skulbah North Eastern Hill University (NEHU) kaba la ktah shi katdei eh ïa ka pule-dangle jong ki samla.
Kane ka jingpynpaw jong u Saleng, imat ka long kaba dei bad kaba shisha namar na ki jinglap bad sakhi, la ju ïohi ba haba don kino-kino ki jingjia ne ki jingïakynad, ka Sorkar Pdeng kam ju peit ne phai khmat ban shimkhia ban ïakren ïa pynbeit ne pynïasuk hynrei la shu ieh beit ha ka jingstad bad jingsngewthuh jong kito ki Jylla kiba mad ïa ki jingeh. Ym tang ka Sorkar Pdeng ne ka Delhi ka bym kheiñ snep hynrei lah ruh ban ïohi ba wat ki lad pathai khubor (National Media) kim ju phaikhmat satia ban shim ba ki jingjia ha ka thaiñ Shatei Lam-Mihngi kin dei kiba kongsan. Kine ki National Media, ki lah ban pyni ïa ka jingïakren bad jingïatai ki bym da shongnia baroh shi sngi hynrei ïa ka jingjia ïakynad ha Manipur bad ruh ka kynrum-kynram ha NEHU, ki leh matlah bad leh kyllut. Kane ka pyni ba ïa ka thaiñ Shatei Lam-Mihngi kim kheiñ snep satia bad kaba kin kynmaw kan dei thik tang ha ki por ïalap ilekshon namar ki sngewthuh ba ki donkam ïa u paidbah bad dei tang ha ka por ilekshon ba kin wan ban ïalap bad pynbiej paidbah ba ki don shisha ïa kata ka jingsngewkhia na ka bynta ka dong ka thaiñ.
Haba ïanujor bad ki phew snem kiba la leit, ym lah ban len ba ka thaiñ Shatei Lam-Mihngi ka la kiew shibun bad wat ki kam pyntriem ruh ki la duna bha bad kane ka jingkiew ruh ka dei lyngba ka jingmih jong ki Nongïalam na kane ka thaiñ kiba don ïa ka jingïohi jngai bad ki jingmut jingpyrkhat kiba lashai. Ka jingphai khmat jong ka Sorkar Pdeng sha ka thaiñ Shatei Lam-Mihngi, ka long beit tang ha ka por ba kin wan buh mawnongrim na ka bynta ki skhim bapher-bapher ne ban leit jurip ïa ki skhim kiba la pyntrei bad kumjuh ban wan pynpyngngad ïa la ka jabieng. La ju sakhi hapoh Meghalaya ba ka jingwan ïuh kjat jong ki Myntri ka Sorkar Pdeng ka jur bha na kawei ka por sha kawei pat, tangba dei ban sngewthuh pat ba kane ruh ka dei namar hangne ngi don ïa ka NEC, ka IIM, ka NEIGRIHMS bad bun bah kiwei pat ki jingdon jong ka Sorkar Pdeng. Hynrei ka jingkylli kaba mih mynta, ka long balei pat ki kloi ban wan ïuh kjat na ka bynta ban buh mawnongrim ne jurip skhim? Balei pat kim lah ban phai khmat haba don kino-kino ki jingjia kiba ktah shisha ym tang ïa ka roi ka par hynrei ïa ka pule puthi, ka lawei jong ki samla bad kumta ter ter.
Nalor kitei ki mat, ka jingleh bym pushe ka Delhi ïa ka thaiñ ka paw ruh lyngba u pud u sam ba la phiah ïa ki jylla ha ka thaiñ Shatei Lam-Mihngi, ha kaba la ju sakhi na ka por sha ka por, ka ju mih beit ka jingïakynad ha ki thaiñ khappud namar ka jingïakyntur pud ne klun jaka jubor. Ngi sngewthuh ba kum ki Nongïalam Jylla, wat la kin pynpaw ba ka jingïakren hapdeng ki jylla ka long kaba seisoh haba ïakren halor ka jingpynbeit pud pynbeit sam, hynrei ha kaba kut mano bym kwah ban pynïar ïa la u tnum u tyndai bad ban ïarap beit ïa la ki jong ki briew. Balei ka Sorkar India kam tuklar halor kane ka bynta ban shim ka lad ban long kum ka nongpynbeit. Kine kiei-kiei baroh ki long tang khyndiat ki daw kiba hakhmat kaba pyni ïa ka jingleh bym kheiñ snep ne pushe ïa ka thaiñ Shatei Lam-Mihngi. Kumta ka por ka la long shisha kaba donkam ban ïadon noh ka jingïatylli ban long kawei ka sur ban rah sha Delhi, hynrei ban leit hi marwei marwei kan nym poi shaei shaei naba yn nym don ba sngap satia.
