Khliehriat, Naiwieng 26
Da ka jingbud ryntih ïa ka hukum ba la pynmih da ka High Court of Meghalaya, ka National Highway Authority of India (NHAI) ka la sdang ïa ka jingtrei bad maramot ïa ka surok National Highway-6 naduh Lumshnong shaduh Malidor ha East Jaiñtia Hills District.
Khnang ban pynthikna ba yn pyndep kloi ïa ki kam shna bad maramot ïa ka surok bah National Highway kaba la jot bha, la buh da ki katto-katne ki kyndon pynïaid kali ha ka jingïatreilang hapdeng ki pulit bad u Project Director, NHAI ha ki jaka ba la kdew da ka NHAI, la pyntip u Deputy Commissioner & Chairman Disaster Management Authority, East Jaiñtia Hills District.
Ki kali rit (LMV) na ka bynta ki paidbah ki lah ban ïaid ha baroh arliang ka surok, katba ki kali heh (HMV) ki lah ban ïaid da ka One Way Traffic da kaba bud ïa ki jingbthah ki pulit.
Katba ka jingpyntrei ka dang ïaid, ka NHAI kan buh ïa ki signboard na ka bynta ban ïohi ha ka por mynmiet khnang ban ïada na kano kano ka jingjia kaba sniew ha ka por ba ki kam ki dang ïaid.
Ki Signboard kin kdew ïa ki jaka ba ma, kum ki jingkieng, ki nala, thiew kiba kham heh bad kiwei kiwei.
U Deputy Commissioner u la pyntip ba lada ka NHAI ka donkam ban khang surok na ka bynta ka jingtrei, yn pyntip shwa sha ki pulit ba kin leh ïa kaba donkam khnang ban ym thut ka leit ka wan ki paidbah.
U DC u la bthah ïa u Superintendent of Police bad u Project Director, NHAI ban don ka jingïatreilang ban lait na kano kano ka jingjia ha ka leit ka wan bad ban pynsuk ruh ïa ki paidbah.
