Shillong, Naiwieng 26
Ha ka step phyrngab jong ka 26 tarik mynta u Naiwieng ha ka por kumba 2:35 eiei, ar ngut ki mentuh ki la leit prong hapoh ka ‘Grotto Chapel’ jong ka Cathedral Parish, Laitumkhrah.
Katkum ba paw ha ka kor ringdur CCTV, la ïohi ba kitei ki mentuh ki la swait shwa hapoh katei ka ïingmane haduh shikynta shiteng, hadien ki la ïoh ban prong na ka jingkhang kaba don sha ka liang kadiang, ki la leit ha kawei ka kamra bad pynpait ïa ar tylli ki duli, ha kaba ki la ïoh ban tuh ïa kawei ka laptop bad ka pisa na ar tylli ki synduk bai kynshew kaba kot sha ka T.15,000 eiei.
Na ka liang ki bor ba dei khmih jong ka ïingmane ki la ujor da ka ejahar ha thanat Laitumkhrah bad ka jingtohkit ban ïohkem ïa ki runar ka la ïaid.
