D. H. Kharkongor
Ym lah khlem da sngewsynnei, naduh ïa uba khladnoh jyndat tad haduh ïa kaba mynsaw. Ha kaba ïadei kyrpang bad uba la khlad noh ba ym lah khlem da sngewlem ïa ki kmie ki kpa ki jong u lem bad ka ïing hi baroh kawei. Halor kato ka jingjia ka eh ban ong mano ba dei bad mano ba lait. Ka eh wei haba ym don hi dalade, ha kata ka jaka jong ka jingjia bad khamtam eh ha kato hi ka khyllipmat ba ka jia. Ka eh namar kata ban ong mano ba dei bad mano ba lait, wei haba ym shym la sakhi da la ki jong ki khmat.
Ynda haba kumta kaei ka jingïapher hapdeng kita ki ‘High Level’ bad kita ki ‘VIP’. Ngan ieh pat de ha phi ki nongpule ba phin ïa jubab, hadien ba phi lah ïa puson sani bha halor katei ka jingkylli. Nga ngeit phin ïa kubur pat de bad nga ba jan baroh uba don ïa ka jingïadei kaba jan bad kita ki ‘High Level’ u ju sngewtynnad ban ñiew ïalade ba u ruh u dei uta u ‘High Level’. Ka long kumta kumjuh bad ki katto-katne kiba don ïa ka jingïadei kaba jan bha bad ki VIP ki bapli kim ïapher ei ei ruh em na kata ka ‘Kada kaba kit Blei Thaw’. Ki ruh ki ju ñiew ïalade ba ki dei ki VIP. Ki da thrang ruh de ba ngi baroh ngin ñiew ïa ki ba ki ruh ki dei ki VIP. Te kumta ki bapli ki ngeit ba ki ruh ki don ïa ka hok ba kin dawa na ngi, u paid knup paid trap ba shida mynsiem, ïa ka nguh ka dem kaba kumba ngi ju poi ban nguh ban dem ïa ki VIP. La lap la shem ba ju leh VIP lang ruh naduh i tnga tad haduh ki khun ki kti, kata, nalor ki hynmen bad ki para. La ju lap la ju shem ba ïa ka kali VIP la shong sarong pynban da ki bym dei ki VIP, nalor kaba ki sngewdei ba yn pynmeh kyrpang ïa ka ‘VIP Light’ lem bad kaba pynsawa kyrpang ïa ka ‘VIP Siren’.
Haba phai biang sa kato ka jingjia ba ka eh shisha ban ong mano ba dei bad mano ba lait wei haba la ju sakhi ïa ka jinglong kaba khyllah ka jong ki arliang mamla, kata naduh ïa ki katto-katne ngut ki nongñiah jong ki arshaka (two wheelers) tad haduh ïa ki katto katne ngut kiba ju ñiah ïa ki ‘Pilot Vehicles’ ne ki kali kiba prat lynti kyrpang na ka bynta ka kali ka jong ki VIP. Ka long ruh kumta kumjuh naduh ïa ki katto-katne ngut ki nongñiah jong ki kali kiba rit tad haduh ïa ki kato katne ngut kiba ju synran nadien ïa ki VIP. Haoid, ym baroh uba ñiah arshaka bad ym baroh uba ñiah saw saka u long khyllah jinglong.
Ki don ki nongñiah ki bym suitñiew ïa ka jingriew jong ka ‘siren’. Kam pher la ka dei ka ‘siren’ jong ka ‘Pilot/Escort Vehicle’ ne ka ‘siren’ jong ka ‘Ambulance’. La ki ïohsngew kyndiang bad biang por ïa ka jingriew jong ka ‘siren’ pynban kim suitñiew ban pynsuki. Kim suitñiew hi ruh ban wad lad ban ïoh ban kynriah shwa ïalade kham sha kynriang surok. Ka rukom ñiah kaba kumba kata ka ‘siren’ kaba riew na shadien jong ki ka dei pynban ka nongïarap prat lynti ïa ki. ñiuma, kim banse ban ailad shwa ïa kata ka ‘VIP Entourage’ ne ïa kata ka ‘Ambulance’, kaba wan nadien jong ki, hynrei ki da apthap pat de tang kumno ba kin ïoh ban bud lem wia wia nadien jong ki. Ka rukom leh kaba kumba ki ruh ki dei shibynta bad kata ka ‘motorcade’ ne ‘convoy’ ne ka kynhun kali kaba synran kyrpang, nadien, jong kata ka kali VIP.
Ngi kynnoh ka ‘VIP Culture’. Ngi khñium ngi khniam ba ngi la ngiah hi shoiñ ïa ka ‘VIP Culture’. Ngi klet noh pat ba dei ma ngi hi kiba nang ïai kyntiew skongshuh shuh ïa ki, sha kata ka kyrdan ‘VIP’. Ngi da sarong biej ruh de ba ngi ïajan ha ka jingïadei ne ba ngi ithuh ithaw bha ïa ki, kum kita ki VIP. Kaba katno tam ïa kine ki ‘Blei Khyndew ba San Snem’. Ka dei ka jingshisha ba ngi da sngew phuhmut-phuhmat haba ki ‘VIP’ ki khot (address) ïa ngi da ka kyrteng ka jong ngi. Kaba katno tam haba ki da kloi ban ïa khublei kti kyrpang bad ngi. Ynda haba ïoh ban ïa khublei kti kyrpang bad ki te wat ban thet-kti ruh lah sngewbynnud. Lada kin kdup bad kin thap met lei te tang katta lah hieng ka khmut kat ka krem dewïong. Lah sngew kham halor ruh de ban ïa kita kiwei kiba ïa don ryngkat, ha kata hi ka khyllipmat. Ngi da ap kyrpang kmang, tang shu ïoh khubor ba kin wan poi. Ka kali ita I VIP kam pat ïeng ngi lah da ïaknieh para ma ngi ban ïoh ban pynplie kyrpang ïa ka jingkhang kali. Ngi kloi wat ban pynïarap plie bad pynkup ïa ka shatri. Na kaba ngi shong ruh ngin ïeng. Ngi da pynrit ruh ïalade kum I ‘syiar pang khlam’.
Ka dei ka jingshisha ba ngi da khot kyrpang ïa ki jingkhawai, kata, wat lada ngim don ïa ka jingïadei kur dei kha dei man. Ngi da khmih lynti ba kim dei ban pep. Ka khawai shongkurim kam don dor lada khlem ka jingdon ka jong ki. Ynda ha ka ïap ruh ngi ju khmih lynti ba kin wan poi mar mar, tang shu mar ïa pyntip. Ha ka pang ka shitom ruh ngi ju khmih lynti ba kin wan peit wan jngoh kyrpang. Ngi da kynmaw sngi ban khot ïa ki, kum ki ‘Kongsan’ bad ki ‘Symbud Kongsan’, wat ha ki ‘Programme’ kiba tang kumne-kumtai. Kim dei ban pep wei haba ngi khot ngi wer kyrpang bad ngim sngewtynnad hi ruh ba kin poi dier por. Ka dei ka jingshisha ba ngin ïoh daw lada ki VIP ki jong ngi kin poi slem kumjuh kumba ngin ïoh daw lada kin wan ha ryngkat ki ‘Escort’, ka pynmeh ‘light saw lem bad ka jingpynpah ïa ka ‘Siren’.
