Shillong, Naiwieng 26
Ka tnat Pynroi Sor (Urban Affairs) jong ka Sorkar Jylla kam da kyrkieh palat ban pynkynriah ïa ki nongshong die madan hapoh sor Shillong kumjuh ïa kiba die ha surok Khyndailad. Ïa kane la pynpaw da u Symbud Myntri Rangbah ba khmih ïa ka tnat Pynroi Sor, u Bah Sniawbhalang Dhar haba kren bad ki nonglum khubor ha ka sngi Ba-ar.
“Kumba ka long mynta kin don beit kumto shwa kumba ju long, ym dei ba ngi la pynsangeh ïa ka jingthmu ban pynkynriah ïa ki. Mynta ka la dei sa ka aïom lehkmen kum ka Khristmas, ngin sa shim ïa ka rai hadien ba ngi la dep ïapynbeit bha”, u la ong.
Lah ban kdew ba ka tnat Jngohkai jong ka Sorkar Jylla ka la pynbna ban pyndep noh ka jingpynkynriah ïa ki nongdie madan sha ki jaka ba la ithuh da ka Sorkar hapoh mynta u Naiwieng, hynrei ki nongdie madan kiba pyrshah ïa kane ka jingthmu ki la pynlong da ka jingïakhih da kaba tur pan jingshai na ka shlem treikam jong ka Shillong Municipal Board (SMB) ha ka sngi Thohdieng jong ka taïew ba la dep, bad ha ka miet jong ka sngi Saitjaiñ pat ki la phriang ïa ki mar ba ki die haduh ka por shiteng miet ha Khyndailad.
“Ngin ïashong pyrkhat lang bad ka tnat Jngohkai, ka tnat Pynroi Sor ryngkat lang ruh ki seng jong ki nongdie madan hadien kata ngin sa shim ïa ka rai, ka Sorkar kan sa bishar bniah bha ïa kane ka kam”, la ong u Bah Dhar.
Haba kylli ïa ka jingkharoi ki nongdie madan katba dang mih ki sngi, u la ong ba ka Sorkar ka la shim khia ruh ïa kane, bad pyntip ba ka jingpynkhreh ka la ïaid ban pynkynriah da ka jingsngewthuh lang bad ki nongdie madan kynthup ruh ka tnat Jngohkai.
Haba kylli shuh shuh, u Symbud Myntri Rangbah u la ong ba dang donkam sa 4-5 tylli ki jaka ban hap wad. U la ong ba ïa mynta ym pat lah ban batai haduh katno tylli ki jaka yn buh bad ka jingwad ïa ki jaka ka dang ïaid namar ka jingbun palat ki nongdie madan.
“Hadien ba la lah ban ithuh ïa ki jaka ban shong ki nongdie madan, ka jingpynkynriah ïa ki kan long shi bynta-bynta”, u la ong.
U Bah Dhar u la ong ruh, “Ki dei ki briew jong ngi, nga kyrpad ïa ki ba kim dei ban khuslai palat bad kim dei ban leh kyrkieh, ngin ïada ïa ka hok jong ki”.
