Shillong, Naiwieng 27
Ka kynhun ki nongtrei kiba don hapoh ka shatri jong ka Mawmluh Cherra Cements Employees Union (MCCEU) hadien ka jingjied ïa u President bathymmai ka kynhun ha ka 25 tarik Naiwieng 2024, ki la leit ban buh da ka dorkhas sha ka shlem treikam jong u Myntri Rangbah ka Jylla, u Conrad K Sangma bad kumjuh r sha u Symbud Myntri Rangbah ka Jylla, Bah Sniawbhalang Dhar halor ki saw tylli ki mat jingdawa jong ka seng.
Haba ïakren bad ki nongthoh khubor, u General Secretary jong ka MCCEU, u Bah Arnold L Thabah u la ong ba ka rai ba hakhmat ba ka shim da ka kynhun ha ka jingïalang kaba la dep ban long dang shen, ka long ka jingdawa na ka Sorkar ba kan siew dep noh ïa ka tulop kumba ka dei ban siew bad kumba ki ju ïoh ha kine ki por ba la dep bad ba ym dep ban siew tang shiteng.
Kiwei pat ki mat ba ka seng ka la kyntu ïa ka Sorkar ka long ban kham pynkloi ha ka ban pyntreikam ïa kane ka karkhana, nangta pat ban siew 48 bnai ka VRS sha baroh ki nongtrei kane ka karkhana bad ban ai jingkyrshan ïa kiwei pat ki nongtrei ‘contractual’ bad kiba wan shah hikai.
Na ka liang u President ka Union, Bah Pynskhem Lyngdoh u la ïathuh ba ka Union ka la pyndam noh ïa kito kiwei ki mat jingdawa kiba ki la dawa na ka Sorkar hynrei ban pynsngew pat sha ka Sorkar halor kine ki saw tylli ki mat khnang ba ki nongtrei jong kane ka karkhana kin ïoh jingmyntoi lang.
U Bah Lyngdoh u la ong ruh ba ka Sorkar ka ju ai jingïarap ïa ki na ka por sha ka por hynrei hapdeng kine ki jingïarap kumba 3-4 bnai eiei, ka la hiar ka jingai jingïarap, bad kane ka la ktah shibun ïa ki kum ki nongtrei.
“Ka ju ai jingïarap ïa ngi kaba long shisien lai bnai lyngba ki jingïakut jong ngi bad ka Sorkar hynrei mynta ngi la ïoh sa tang shiteng bad kane ka la ktah ïa ngi. Kumba phi tip hi, ka ïoh ka kot ka dei kawei ba ngi ju ïakren na ka por sha ka por bad ngi la ju ïakynduh bad ka Sorkar ha kaba ka la kular ruh ba kan dang ïai ïarap hynrei hapdeng kine ki 3-4 bnai, kane ka jingïarap ka lah hiar”, bynrap u Bah Lyngdoh. Shuh-shuh u la bynrap da kaba ong ba kum ka seng ka kyntu ruh ïa ka Sorkar ba kan phaikhmat lem sha kito ki nongtrei ‘contractual’ ba kin ïoh lang ïa ka skhim wat la ki la tip ba kan long kaba jynjar ruh, hynrei ki la kyntu pat ïa ka Sorkar ba kan plie lad-plie lynti lem da kumwei pat na ka bynta jong ki.
