Jowai, Naiwieng 27
Ka Demthring ka la jop da 2-0 kol pyrshah ïa ka 7 Wasa United, katba ka Mukhla Raij bad Shangpung Lumiawmuchai ki la ïakhaid ha ka lympung ïalehkai Super Division Football Tournament na ka bynta ka U Kiang Nangbah Memorial Trophy 2024.
Ha kane ka lympung ba la pynïaid da ka West Jaiñtia District Sports Association (WJDSA) ha ka Sngi Balang ha madan Kiang Nangbah Stadium, Jowai, ka Demthring ka la lah ban thep 2-0 kol ïa ka 7 Wasa United bad kine ki la wan lyngba u Wadshwa Lato ha ka minit kaba 65 bad Marshial Nongrum (90+1).
Da kane ka nam jop ka Demthriang ka la jam sha ka kyrdan ba ar ryngkat 13 poiñ na ki hynriew sien ïakhun, katba 7 Wasa United ka dang don 8 poiñ.
Hashwa kane, ka jingïalehkai kaba la long hapdeng ka Mukhla Raij pyrshah ïa ka Shangpung Lumiawmuchai ka la kut noh ha ka jingïakhaid khlem da lah ban pynkhih jar.
Haba phai sha ka miej ïakhein poiñ, ka Mukhla Raij ha ka jingïakhun mar 6 sien ka la ïoh 6 poiñ, katba ka Shangpung Lumiawmushai 4 poiñ.
Ka jingïalehkai ha ka Sngi Palei kan long hapdeng ka Nangbah Mulang pyshah ïa ka Sailung Ïalong haka por 1 baje mynsngi, katba ka Wahïajer ïa ka Ladthadlaboh ha ka por 2 baje nohphai sngi.
