Ka South West Khasi Hills District lah ban ong ka don bun bha ki jaka jngoh kai ba itynnad. Hynrei na ka daw ka jingbym don surok kiba biang ka khanglad ïa ki nongwan jngoh kai ban wan sha kine ki thaiñ. Ka Ranikor Constituency lei lei ka long ka jaka kaba itynnad bha ha ka jingdon ki lum ki wah bad ki shnong ba itynnad kum ka shnong Nongnah kaba la ker baroh sawdong da ki riat bad ki lyhuh bah.
Ka jingdon ki jaka jngoh kai kum ka Krem Mawtynhiang bad ka pung sum shrieh ha shiteng riat ka khring bha ia ki nongwan jngoh kai pyrthei lada lah ban pynbha bad pynitynnad ia kum kine ki jaka jngoh kai.
Lada lah lei lei ban pynpoi surok ha kliar u Lum Iawpaw uba long kum u syntai lum uba ïeng kum u kliar lum bah ha khappud ka ri Bangladesh kan khring shibun ki tourist na kylleng ka ri ban wan jngoh kai halor une u lum ba pawnam ka ïawpaw.
Nalor jong une u Lum lah ban ïohi kyndiang ïa ki jaka madan ne ki them ka ri Bangladesh bad ki shnong ka ri Bangladesh kiba don ym da jngai bad ki shnong ka Sourth West Khasi Hills District ka Jylla Meghalaya. Nalor ka jingdon ka wah kynshi kaba heh bha ha kane ka thaiñ bad kiwei ki wah kum ka wah Rilang, wah Ummawpa lane wah Rimen bad ki wah kiba rit kiba pynitynnad shibun ïa kane ka thain khappud bad ka ri Bangladesh mynta lane ka East Pakistan mynnor.
Ka long ruh ka jaka kaba la ker sawdong da ki khlaw kiba dang jyrngam ba pynitynnad ïa ka thaiñ baroh kawei. Ka South West Khasi Hills ka long da shisha ka district kaba don bun bha ki jaka jngoh kai ba itynnad lada lah ban pynpoi surok bad pynïoh jingïarap na ka tnad shangkai kan long ka jingkyrkhu ïa ki shnong ka district bad ka ri Khasi hi baroh kawei.
C. B. Iawphniaw
