Shillong, Naiwieng 27
U Manager jong ka Manchester City, Pep Guardiola, u ong ba um shym la thmu “ban leh sting” ïa ka jingpynmynsaw ïalade, haba u jubab ïa ka jingkylli, halor ki jingmong ha ka khmut jong u.
Kane ka la wan hadien ba ka City ka la shah pynïakhaid mar 3-3 kol pyrshah ïa ka Feyenoord wat la ka tam shwa da 3 kol ha ka Champions League ha ka Sngi Balang. Hadien kane ka jingïalehkai la ïohi ïa u Guardiola ba u don katto-katne ki dak thoh ha ka khlieh jong u ha ka jingïakren bad ki lad pathai khubor.
Haba la kylli da ki nongthoh khubor ha ka por ba u ïakren bad ki lad pathai khubor shaphang ka dak ha ka khmut jong u, u Guardiola uba la ktah ïa ka jaka kaba la mong bad ong: “Da ka shynriah kti jong nga bad ka tyrsim jong nga.”
Une u manager ba la 53 snem ka rta u la ong “Nga kwah ban pynmynsaw ïalade” shwa ban rkhie bad mih noh na ka jingïalang bad ki nongthoh khubor.
“Nga la shah kylli jingkylli ha kaba kut jong ka jingïalang bad ki nongthoh khubor hynnin ka miet shaphang ka jingpaw ki dak ha ka durkhmat jong nga bad kaba la batai ba ka dei na ka tyrsim jong ka shynriah kti kaba la la wan jia ryngkhat,” ong ka kyrwoh ba la pynmih u Guardiola ha ka rynsan jong ka X bad Instagram.
“Ka jubab jong nga kam shym la thmu satia ban pynshai ïa ka mat kaba khia bha jong ka jingpynmynsaw ïalade.”
Katei ka jingïakhaid pyrshah ïa ka Feyenoord ha Etihad Stadium ka la pynkut noh ïa ka jingshah rem jong ka City kaba san sien.
Hynrei kane ka klob kam shym la jop satia naduh ba ka la pynliem ïa ka Southampton da 1-0 kol ha ka 26 tarik u Risaw.
Katei ka kynhun jong u Guardiola ka la don ha ka kyrdan kaba 15 ha ka miej ïakheiñ jong ki 36 tylli ki kynhun ha ka Champions League bad ka don ha ka kyrdan 2 ha ka Premier League bad duna sa 8 poiñ ïa ka Liverpool kaba dang lamkhmat, kaba kan ïakhun ha Anfield ha ka Sngi U Blei.
