Guwahati, Naiwieng:
U Myntri Rangbah ka Manipur u N Biren Singh u la ong hynnin ka sngi ba ka jingkhynra pyrshah ïa ki lehnoh ha kane ka jylla ka la sdang bad kane kan kynthup ïa ka jylla baroh kawei ha kano-kano ka jaka ba don ki lehnoh bad ki ‘riew kieng atiar beaiñ.
Ka la don ka jingshim rai ban pynjur ïa ki jingpyntreikam pyrshah ïa ki kynhun lehnoh. Ïa ka jing-leit thwet bad khynra lehnoh la dep ban pynlong shwa ha Jiribam; ka jaka ba la jia ka jingshah thombor kaba dang shen bad kan sa bteng sha kiwei pat ki jaka jong ka jylla tad haduh ban da pynngat ïa ki nongleh kam sniew ha ki kyndon jong ka aiñ, u la ong.
Ka jingpyntreikam kan ym long tang ha ki jaka ba bun ki Kuki hynrei kan wad ia baroh kito kiba la thied tiar beaiñ. Haba kren bad ki nongthoh khubor ha Imphal, u Singh u la ong, “Ka jingkhynra pyrshah ïa ki lehnoh ka la sdang na Jiribam. Hynrei kan long ha ka jylla baroh kawei ha kano-kano ka jaka ba don ki lehnoh kiba don tiar siat beain.”
U Singh u la ong ruh ba ka sorkar jylla ka la wad bor shuh shuh na ka sorkar pdeng ban pynsngewskhem ïa ki paidbah.
Haduh kaba kut jong une u bnai, ka Manipur kan don haduh 288 tylli ki kynhun jong ki shipai ïada ri jong ka sorkar pdeng.
Ki la don 6 ngut ki briew ha kaba baroh ki dei ki kynthei bad ki khynnah na ka jaitbynriew Meitei, kiba la shah pynïap ha Manipur ha kaba sdang jong mynta u bnai, kaba la pynmih bad wanrah ïa ki jingïakhih kiba jur bad kaba la nang pynneh ïa ka jingshah thombor kaba ka jylla ka la don naduh u snem ba la lah. Napdeng kiba la shah pynïap ki la don ki khynnah rit — uwei na ki u dei uba dang 8 bnai.
Baroh 6 ngut ki shong ki sah ha ka jaka sah ba shipor ha Jiribam Borobekra hadien ba ki la duh noh ïa la ki ïing ki sem haba la jia ka jingïakynad jaitbynriew hadpeng ki Kuki bad ki Meitei kaba la sdang naduh u bnai Jymmang jong u snem ba la lah.
Ka jingïakynad kaba dang jia shen ka la sdang naduh ka 11 tarik, Naiwieng, ha kaba palat arphew ngut ki lehnoh Kuki ki la thombor ïa kawei ka jaka treikam jong ki pulit kaba don ha Borobekra, hajan u pud u sam jong ka Assam.
Katba ki dang pynïap ïa ar ngut ki ‘riew rangbah na ka jaitbynriew Meitei, kawei pat ka kynhun ka la rahbor ïa ki kynthei bad ki khynnah.
Hadien la lap ïa ki 6 tylli ki met ïap ba per bad tuid ha ka wah. Lai ngut napdeng jong ki, ki la shah siat, ka met jong ki ka pynpaw ïa ki dak mynsaw bad ki jingmong kiba bun.
Ïa ki kaiphot jong ka jingkhmih bniah ïa ka met jong kiwei pat ki lai ngut kiba kynthup jong uwei u khyllung ba dang 8 bnai, ka kynthei ba dang 31 snem bad ka khun kynthei jong ka ba dang 8 snem ka rta, ym shym la pyllait da ki pulit.
Ki don ki jingsngewkhia bad ki jing-artatien naba la paw shai ba ki kaiphot ki lah ban don ei ei sha lyndet ha kaba kane ka lah ban nang pynmih bad pynjur biang ïa ki jingïakhih paidbah bad kan wanrah ïa ka jingïakynad bad ki kam thombor kiba jur.
Haduh mynta, ka jingshah thombor hapdeng ki jaitbynriew ha ka jylla, ka la pynduh ïa ki 258 tylli ki mynsiem briew, kynthup ïa ka jong kito kiba la shahñiew ba ki dei ki lehnoh. Ki la don palat 3,000 tylli ki tiar siat bad ki tiar ïaleh ïa kiba la shah lute la ïoh ban kurup.
