Shillong, Naiwieng 27
U Myntri Rangbah ka Jylla u Conrad K Sangma haba pynpaw ïa ka jingkmen ba kum ka NPP marwei kan kot sha ki 32 ngut ki MLA, u la pynthikna ba ka jingïatreilang kan ïaid beit shakhmat bad ki paralok ba ïatreilang hapoh ka Sorkar Meghalaya Democratic Alliance (MDA).
Haba kren sha ki lad pathai khubor ha ka Sngi Balang hadien ka jingdep bam smai jong ka MLA kaba dang shu shah jied thymmai na Gambegre Konstitwensi ka Dr Meh-tab Chandee A Sang-ma, u Conrad u la ai khublei sha ki paidbah, kiba la ai ïa ka jingshaniah ïa ka seng, wat la ka Gambegre ka la long ka konstitwensi kaba kham eh na ka bynta ka NPP ha kine ki snem kiba la leit.
“Wat la ngi la kiew ha ka jingbun paid jong ki dkhot hapoh ka ïingdorbar kata sha ka 32 ngut, kaba la long ruh ka sien ba nyngkong hadien ka seng APHLC, hynrei ka khubor kaba shai ka long ba ngin bteng ïa ka jingïatreilang bad ki paralok MDA kumba la ïaid baroh shi katta,” u la ong bad bynrap ba kum ka kynhun synrop bad ruh kum u Myntri Rangbah u kwah ban ai ka khubor kaba shai ba ka jylla ka donkam ïa ka jingsynshar kaba neh, ka jingshaniah bad kaba kiew ha baroh ki liang.
“Hooid, wat la ngi la don ka jingbun paid, ngin ïai neh bad ki, namar ha ka por ba ngi donkam, ki la pyni ïa ka jingshaniah ka jong ki, kumta mynta ka dei sa ka pali jong ngi, na ka bynta ban kyntiew ïa ka jylla ha ki liang baroh,” la ong u Conrad bad bynrap, “Hooid ha ka Sorkar synrop ka don ka jingeh, ka jingïapher ha ka jingpyrkhat jong ki seng saiñ pyrthei, hynrei ngi donkam ban ïatreilang ryngkat pat.”
“Baroh ki MLA jong ngi ki dap da ka jingkmen, bad kam don satia ka jingshah pynbor ha nga, hynrei ki la pynpaw ka jingshaniah. Hooid ki don kiba pynpaw ba ki kwah ban ïohi kham bun ki Myntri hynrei ngi hap ban peit pat ïa ka jingbha ka jylla. Ngim dei ban shim ne phai ka jingbha ïa ka thaiñ Garo, Khasi ne Jaiñtia hynrei na ka bynta ka Jylla hi baroh kawei,” la ong u Conrad.
