Shillong, Naiwieng 27
Ka Khun Hynñiewtrep National Awakening Movement (KHNAM) ka la pynkhreh ban sei kyrtong tang sha Khasi Hills Autonomous District Council (KHADC) na ka bynta ka ilekshon MDC ka ban sa long ha u Rymphang 2025, katba ha Jaiñtia Hills Autono-mous District Council (JHADC) kan ym pynïa-khun satia.
U Working President ka KHNAM, Bah Thomas Passah u la ong ba ka seng ka la pynkhreh bha ban ïakhun ïa ka ilekshon sha KHADC, bad haduh mynta la jan kot 20 tylli ki konstitwensi kiba ki kyrtong ki la mih shakhmat ban pan tiket.
U la ïathuh ba ka seng kan sa shong ïa ka jingïalang jong ka Central Executive Committee (CEC) ban pynbna ïa ki kyrtong ha ka kylla kaba nyngkong.
“Ngin sei kyrtong tang ha ka ilekshon sha KHADC, sha JHADC ngin nym shim bynta wat la ngi la don 2-3 ngut kiba kwah ban ïakhun namar ba kim pat biang bha. Ngi donkam shwa ban pynleit jingmut ïa ka KHADC”, la ong u Bah Passah.
Lah ban kdew ba ka KHNAM ïa kaba la seng naduh u snem 2002 ka khlem sei kyrtong satia ha ka ilekshon MLA 2023, bad ka dei kawei na ki seng riewlum ha ka saiñpyrthei kaba ki paidbah kim da ïakren than ha ka por ilekshon.
Haba kylli, u Bah Passah u la kubur ba ka KHNAM ha ka ilekshon kam da long shakhmat, hynrei u la ong ba ka kamram jong ka seng ka long ban ïai trei bad ki paidbah ki sakhi ba ka KHNAM kum ka seng ka ïai mih man ka por, ym tang ha ka por ilekshon.
“Ka wan ka ilekshon mynta ngi pyrshang ban pynkhreh, hooid ngim lah ban pynshongshit namar ba ka seng kam don ïa ka pisa, ngi pyrshang ban pynkhlaiñ ïa ka seng da ka nongrim”, u la ong.
U la ong shuh shuh ba kaei ba ka KHNAM ka lah ban leh ka long ban wad ïa ki kyrtong kiba don ïa ka jingthmu kaba shai bad kiba don ka jingangnud kaba bha ban treilang ban don kawei ka thong.
“Ha ki konstitwensi kiba ngi la dep don lypa ki kyrtong ngi la bthah ba kin nang ïaid shakhmat”, u la ong. U Nongïalam ka KHNAM u la ong ba ka seng kan ym jah, ka kam ba dei na ka bynta u paidbah ka dei kaba hakhmat eh.
“Ban pynkhlaiñ ïa ka seng ha ka ilekshon ka dei ha u paidbah nongjied, ha ka bor ka jong ngi ka dei ba ngin trei bad shakri, lada ki paidbah ki jied ngin ïoh ïa ki MDC”, la ong u Bah Thomas Passah.
