Shillong, Naiwieng 28
Ka jingïalehkai kaba itynnad katta-katta hadien ka jingsangeh jong ka kylla miet jong ka OC Blue Shillong Premier League 2024 ka la pynlong ïa ka Sawmer SC ban ïoh jingjop da 2-1 kol ïa ka Ryntih FC. Ha kane ka jingïalehkai ïa ka kol kaba khatduh la thep da u Mebanjop Warjri tang kumba 60 sekhon shwa ban wai ka por hadien ba ki la ïakhaid.
U Rheadolf Nongneng Daloi u la pyntam ïa ka Sawmer sha khmat da ka shi kol ha ka minit kaba 13 ha madan ïalehkai SSA bad kane kynhun ka la bat ïa ka liang ka jingjop, hynrei hadien u Allen Lyngdoh Nongbri ka Ryntih FC u la lah ban pynïakhaid da ka kol kaba la ïaid lyngba u rangapkol ka Sawmer u Pyrshangbanlibhaser Dkhar ha ka minit (90’+3). Hynrei tang hadien ba la sdang biang ka jingïalehkai haba ka Ryntih ka khlem poi pyrkhat bad kheiñ sting ïa ka jingïalehkai, u Mebanjop jong ka Sawmer ha ka minit (90’+4) u la ïoh thep ïa ka kol kaba itynnad bad pynïoh syndon ïa ka jingjop haduh bakut ka jingïalehkai.
Kane ka dei ka jingïakhun kaba nyngkong jong ka wat kaba hynriew bad ka dei ka jingjop kaba lai jong ka Sawmer ha kane ka samoi ïalehkai. Da kane jingjop ka la pynlong ïa ka Sawmer ban kiew sha ka kyrdan ba-ar ryngkat 11 poiñ, tangba ka la ïalehkai bunsien ban ïa kiwei ki klob. Wat la ka la pyni katto-katne ki jingkiew ha ka liang ïalehkai, hynrei ka Ryntih ka la shah rem ha ka sien kaba san bad ka dang ïai sah ha ka kyrdan sha trai bad 3 poiñ.
Ha ka jingshisha ka Ryntih ka la ïoh ïa ka kabu kaba biang tam ban thep kol tang ha ka minit kaba 6 lyngba ka penalty hynrei da ka jingtbit jong u Pyrshanbanbha (rangap kol) ka la pynlong ban lait sha thep.
U Rheadolf u la ïohi kumba u thmu ban thep ïa ka bol lyngba u Bickyson Kharkongor hynrei ka bol ka la rung jylliew bha bad ka la rung sha ka kol, lehse ka la shah pynphai kylla (deflection) na u defender.
Kiba bun ki kabu ksiar la duh ei noh da u Diego Khyriem ka Sawmer bad u Basuklang Bina bad u Wanshanlang Dkhar ka Ryntih, baroh na ka jaka ba jan bha, ha shuwa ba ka kylla step kan kut noh.
Hadien kata, ha ka kylla miet, u Pyrshangbanbha u la lah ban ïada biang ïa ka bol na ka free-kick kaba don tang shabar jong ka ‘box’ ban khanglad ïa u Dameki Khongstia. U nongap kol jong ka Sawmer ha ka jingshisha u la don ka sngi kaba u long skhem bha lait noh tang kata ka jingbishar bakla kaba la pynlong ïa ka Ryntih ban ïoh pynïakhaid shipor.
Ka Sawmer kan ïalehkai biang ha ka Lah Sngi U Blei pyrshah ïa ka Shillong Lajong FC ha ka por 11:30 baje mynstep. Hadien kata ka jingïalehkai yn bud sa ka jingïakhun hapdeng ka Laitkor SC pyrshah ïa ka Langsning FC ha ka por 2:30 nohphai sngi.
