Shillong, Naiwieng 28
Ka tnat pulit jong ka Jylla lyngba ka Central Recruitment Board (CRB) ha u kyrwoh khubor ba la pynmih paidbah ha ka 28 tarik Naiwieng 2024, ka la pyntip ba shen kan sa sdang biang ban pynlong ïa ka jingmareh kam pulit ne ka Physical Efficiency Test (PET) na ka bynta ka kam pulit.
Ha kaba ïadei bad kane, na ka liang u IGP-cum-Chairman jong ka Central Recruitment Board (CRB), u Dalton P. Marak, IPS, u la pyntip ba ki tarik bad ki jingtip kiba kham bniah ha kaba ïadei bad ka PET, yn sa pyntip sha baroh ha ka por kaba biang.
Ha kajuh ka por, u la kyntu ruh ïa baroh ki khynnah samla kiba la thep ïa ka kam pulit ba kin ïai peit ïa ki jingpyntip kiba thikna kiba wan lyngba ka ‘website’ jong ka tnad pulit.
Shuh-shuh na ka liang ka tnad pulit ka la kyntu ruh ïa ki khynnah samla ba kin long kiba ïaishah bad kiba ïatreilang bad ka tnad pulit na ka bynta ban pynthikna ba ka jingpynlong biang sa shisien ïa ka PET kan long kaba ïaid beit-ïaid ryntih.
Ka tnad pulit ka la kyntu ruh ïa baroh ki khynnah samla kiba la dep ban thep ïa ka kam pulit ba kin ym shah pynngop ne shah pynbiej ha ki khubor hamsaïa ne ki khubor thok ha kaba ïadei bad ka jingpynlong biang sa shisien ïa ka PET la ka long ha kaba ïadei bad ki tarik ne ki jaka ruh bad haba ki ïohsngew ïa kum kine ki khubor thok, ki dei ban pyntip ne phone beit-beit sha ka ophis jong ka Central Recruitment Board kaba don ha Mawroh, Shillong da kaba phone ha u nombar-6033164273.
Kum ban shu pynkynmaw ba ïa ka PET jong ka jingjied ïa ki samla na ka bynta ka kam pulit, la hap pynsangeh noh tang hadien 3 sngi ba la pynlong na ka daw ka jingdon ka jingthut ha ki kor-ki bor jong ki mashin kiba shim jingkheiñ ïa ka wat haba ki khynnah ki mareh. Dei halor kane na ka liang ka tnad pulit ha ryngkat u Myntri ba dei khmih ïa ka tnad ki kam pohïing ka Jylla, u Bah Prestone Tynsong u la bthah ïa ka tnad pulit jong ka CRB ba kan pynsangeh noh shwa ïa ka PET kat haduh ban da dep ban pynbeit ïa ki kynrum- kynram halor ki tiar kiba la pyndonkam.
