Amlarem, Naiwieng 29
Ka lympung ïalehkai Upper bad Lower Division Football Tournament ba la pynïaid da ka Amlarem Sub Divisional Sports Association (ASSA) ka la nangjam shaphrang ha madan Mini Stadium Ladjaplem, Amlarem.
Haba phai sha ka kyrdan ïalehkai Upper Division kaba la long ha ka sngi Thohdieng hapdeng ka YC Trangblang bad ka Syndai Kmaishnong ki la ïasam mar shi point hadien ba kim shym la lah ban pynkhih jar haduh kaba kut ka jingïalehkai.
Katba ha ka Lower Division, ka Padu United ka la jop da 2-0 kol ïa ka Sankhat SC bad ïa kine ki kol la thep da u Daw Pohthmi ha ka minit kaba 9 & 35.
Ka jingïalehkai kaba bud hapdeng ka Shkenpyrsit SC bad Amtasam SC ki la ïakhaid mar 1-1 kol. Ïa ka kol jong ka Amtasam la thep da u Jenial Rasmut (19) katba ka Shkenpyrsit ka la lah ban pynphai kylla lyngba u Firstborn Kyndait (40).
Ha kawei pat ka jingïalehkai ka Nongtalang YFC ka la pynliem ïa ka YC Moosakhia da 2-1 kol. Ïa ki kol jong ka Nongtalang la thep da u Amchelang Pohchen (16 & 53), katba na ka Mosakhia la thep da u Enowel Khongïong.
