Khliehriat, Naiwieng 29
Ka Chiehruphi SYWSC bad ka Sutnga SSCC ki la ïoh jingjop ha ka Super Division Football Tournament (4th Kyrmen Shylla Contribution Trophy) ba la pynïaid da ka East Jaiñtia Hills District Football Association (EJHDFA) ha madan Artificial Turf kaba don ha Deinshynrum.
Haba phai sha ka jingïalehkai kaba la long ha ka sngi Thohdieng, ka Chiehruphi SYWSC ka la pynliem noh ïa ka Rymbai Shkenshynriah SC da 2-1 kol. Ïa ki kol jong ka Chiehruphi la thep da u Premi Muksor ha ka minit kaba 27 bad u Coming Dkhar (39), katba ka shi kol jong ka Rymbai Shkenshynriah la thep da u Areas Khan (35).
Ha ka jingïalehkai kaba bud, ka Sutnga SSCC ka la pynliem ïa ka Dhana CSC da 1-0 kol. Kane kol ka la wan lyngba ka free-kick ba la shut da u Lalremkung Hmar ha ka minit kaba 89.
Ha ka Sngi Saitjaiñ ka jingïalehkai kan long hapdeng ka Thangskai Tiger pyrshah ïa ka Ladrymbai B SC ha ka por 11:45 mynstep, katba Khliehriat West YWSC ïa ka Rymbai Ïawpynsing SC ha ka por 2:15 baje nohphai sngi.
