Shillong, Naiwieng 29
Ka jingjia shah kynnoh lehbeiñ jong ki khynnah samla kiba la leit ban phah sumar ha ki ‘Rehab Centre’ kiba don hapoh ka Jylla Assam kiba kynthup ïa ka Alive Again Foundation, ka Better Living Wellness Foundation bad ka Ajoy Foundation ïa kiba la long trai da u Bah Arup Passah ka long ka jingjia kaba la pynlong ïa kiba bun na ki khynnah samla bad ki kmie-ki kpa jong ki ba kin mih shakhmat ban pynpaw ïa ka jingpyrshah bad ka jingpynrem kaba jur halor kane.
Halor kane ka jingjia, na ka liang kawei ka longkmie ïa kaba la tip kyrteng kum ka Kong Naomi Marbaniang kaba dei kawei na ki nongtrei mon sngewbha kaba ju khmih bad ïarap ïa kito kiba la ngop ha u drok, ka la leit ban ujor pyrshah ïa u Bah Arup Passah uba dei trai ïa kitei ki ‘Rehab Centre’ ha ka Meghalaya Human Rights Commission (MHRC) halor ka jingshah lehbeiñ jong kitei ki khynnah.
“Mynta ka sngi, ngam banse ban shim ïa kane ka sienjam ba ngin hap ban wan hangne hapoh ka Human Rights Commission ba ngin wad ïa ka jingïarap”, ong ka Kong Marbaniang.
Haba kren sha ki lad pathai khubor ha ka 29 tarik u Naiwieng 2024 hadien ka jingwan ïakynduh ïa ki bor ba halor jong ka Meghalaya Human Rights Commission (MHRC), ka Kong Marbaniang ka la ong ba kitei ki khynnah samla ki la shah bom-shah tied haduh u pud ba la sngew shyrkhei wat tang ban sngap ruh. Kumta ka la pynlong ïa ka ha ryngkat ka jingsynranlang da ki kmie-ki kpa jong kitei ki khynnah ba kin wan ban mih sha ka Commission ban wad ïa ki lad jingïarap.
“Ka HYC ka la leh ïa kaba bha da kaba shimti bad ïalam ïa ki khynnah ban buh ïa ki sha Assam hynrei hadien ngi la ïohsngew pat ïa ki khubor ba ki khynnah shathie ki shah lehbeiñ bad nangta pat, ki la shah bom-shah tied bad shah lehbeiñ har rukom”, la ong ka Kong Marbaniang.
Ha ka jingïakynduh bad ki bor jong ka Commission, ki la bthah ïa katei ka longkmie lem bad ïa ki kmie-ki kpa jong kitei ki khynnah ïa kaei kaba ki dei ban leh bad na ka liang ka Kong Naomi ka la ong ruh ba kan sa ujor da ka ejahar pyrshah ïa u trai jong katei ka ‘Alive Again Foundation’.
“Ngi la dep ban ïakren bad ki bor shapoh ïa kaei kaba ngi dei ban leh bad ïa kaei kaba ngim dei ban leh. Kumba ngi la dep ban ïakren shapoh bad kiba heh, ngi kyrmen ba kin shimkhia ïa kane ka kam kaba ngi la wan ban ïakren mynta ka sngi”, bynrap ka Kong Marbaniang.
Shuh-shuh ka Kong Marbaniang ka la ong ruh ba kan sa ujor da ka ejahar pyrshah ïa ka Alive Again Foundation bad ïa u trai jong katei ka jaka bad ong ba kaba sngewlyngngoh ïa ka jingleh jong u Bah Arup Passah ka long ba u ju rah ïa ki khynnah kiba la ngop ha u drok nangne napoh ka Jylla da ka jingthmu ban leit buh ha ka ‘Alive Again Foundation’ Centre hynrei ynda ki la poi sha ka Jylla Assam pat, ki la rah na kawei ka ‘Rehab’ sha kawei pat khlem kano-kano ka jingïasyllok ne jingpyntip sha ki kmie-ki kpa jong ki khynnah.
“Khlem ka jingtip jong ki kmie-ki kpa, kumno ki lah ban pynkynriah ïa ki khynnah na kawei ka ‘Rehab’ sha kawei ka ‘Rehab’? Ïa kata ruh la leh ha ka por shiteng miet ha ka por ba ki dang ïohthiah bad la kyrsiew ïa ki shiteng miet ban rah na kawei ka ‘Rehab’ sha kawei pat”, ïathuh ka Kong Marbaniang katkum ka jingphla jong ki samla.
